जनता दरबार : संकल्पना बरी, पूण….

भांगरभूंय | प्रतिनिधी

जनता दरबरा वरवीं गांवगिऱ्या वाठारांतल्या लोकां मदीं आशिल्ले जायते तरेचे गोंदळ पयस करून तांचे मदीं उर्जा निर्माण करपाची ही संकल्पना. तिचे वरवीं समाजांत नवें चैतन्य उदेंवपाक चड वेळ लागचो ना.

सरकार सदांच नागरीक वा मतदारांक केंद्रबिंदू मानून वावुरता. सरकाराची प्रशासकी वेवस्था नागरिकांचेर नदर दवरून तांचे खातीर जायत्या तरांच्यो येवजण्यो तयार करता. राज्याचे उदरगती खातीर साबार प्रकारांच्यो कल्याणकारी येवजण्यो चालीक लावप खूब गरजेचें. समाजाची एकंदर समृद्धी, गिरेस्त आनी गरीब हांचे मदलो फरक भरून काडप आनी समाजीक उदरगतीच्या प्रवाहाचेर सतत प्रभाव घालप हो सरकाराचो हेत. सुजलाम, सुफलाम, विकसीत राज्य तयार करपाचें आसल्यार राज्यांनी समाधानी नागरिक आसप खूब गरजेचें. तो सगळेच बाबतींत समाधानी आसूंक जाय. 

सरकारी नोकऱ्यो नासल्यो तरी स्वताचो रोजगार वा वेवसायांतल्यान सरकार अशे घटक लक्षांत दवरून येवजण तयार करता, जाका लागून तांकां अर्थीक स्थिती सुदारूंक येता. गोंयचो विचार केल्यार गोंयांत बऱ्योच कल्याणकारी येवजण्यो आसात. तांचो फायदो सगळ्या घटकांक मेळचो आनी सुखाची समान व्याख्या तयार जावची, हे खातीर यत्न सुरू आसात. कल्याणकारी येवजण्यो खूब आसात. गरिबांनी गिरेस्तांचे वटेन वचूंक जाय. दिव्यांग लोकांनी हे येवजणेचो फायदो घेवन मुखार निर्माण जाल्लो दुख्खाचो दोंगर पयस करून सुखाचो म्हासागर तयार करचो. हेच खातीर तर ह्यो येवजण्यो आसात. समाधानाच्या मार्गांतल्यान वचपाची संद असंतुश्ट मनशाक हे येवजणे वरवीं मेळटा. बायल आसूं वा दादलो. समाजीक रचणुकेच्या प्रवाहाचेर आनी समाजीक उदरगतीचेर प्रभाव घालपाक ह्यो येवजण्यो खूब म्हत्वाच्यो.

गोंय सरकारान ‘जनता दरबार’ नांवाचो एक नवो प्रयोग सुरू केला. फाटल्या एका वर्सा सावन हो प्रयोग सुरू जाला. आतां मेरेन सरकारान उत्तर गोंयच्या म्हापाशें, दिवचल आनी पेडणें वाठारांनी जनता दरबार घडोवन हाडून समग्र उदरगतीची व्याख्या खऱ्यांनीच गांवगिऱ्या वाठारांच्या शेवटाक पावल्या काय ना हाचें  निरिक्षण केलां.

ह्या जनता दरबारांतल्यान सामान्य लोकांक ज्यो समस्या आसात, त्यो कल्याणकारी येवजणे वरवीं सोडोवप शक्य आसा जाल्यार आमी ताचे खातीर यत्न करपाक जाय. अर्थांत सरकारी अधिकारी यत्न करून लेगीत कर्मचारी बरो आदार दिनात जाल्यार सामान्य लोकांक कोणाक तरी आवाहन करचें पडटा. हे खातीर सरकारान जनता दरबाराची बरी संकल्पना सुरू केली. हालींच वाळपय जनता दरबार कार्यावळ सोबीत रितीन जाली. व्हड गर्दी आपलेच प्रस्न मांडटात. ह्या जनता दरबारांतल्यान समस्या सरकाराच्या कानार हाडपाच्या हेतान मांडल्यो. समाज कल्याण मंत्री सुभाष फळदेसाय हाजीर आशिल्ले. तांणी हो कार्यक्रम बरो हाताळ्ळो.

सरकार पावलां उबारतलें

समस्या, विनवणी, सुचोवण्यो सरकारी भौशीक मंचा वरवीं मांडल्यो. ते बाबतींत सरकार निश्चीतपणान निर्णायक पावलां उबारतलें हातूंत दुबाव ना. हाका लागून ह्या जनता दरबारांतल्यान सामान्य नागरिकांक आनी दुबळ्या वर्गांक आपले प्रस्न मांडपाची संद सरकारान दिल्या. आदले मुख्यमंत्री प्रतापसिंह राणे हांणी पयलीं सत्तरी तालुक्यांत गट उदरगत समितीची संकल्पना सुरू केली. इंग्लीशींत ताका ‘बीडीसी’ वा ‘ब्लॉक डेव्हलपमेंट कमिटी’ अशें नांव दिल्लें. हे समितीची बसका दर तीन म्हयन्यांनी जाताली. हे बसके वरवीं सामान्य नागरिकांक आपले प्रस्न सरकारी पांवड्यार मांडपाची संद मेळ्ळी. तांचो आवाज सरकारा मुखार मांडपाची ही बसका एक बरी संकल्पना आशिल्ली. पूण सरकारी अधिकाऱ्यां खातीर तो कठीण काळ आशिल्लो. सरकाराचे कान उगडपाच्या हेतान सामान्य नागरिक हे बसकेंतल्यान ल्हान, व्हड प्रस्न मांडटाले. ह्या वेळार सरकारी अधिकारी भियेवन वागतना दिसले. सरकारी अधिकाऱ्यांचो फायदो घेवपाची संद सामान्य नागरिकांनी चुकयली ना. हाका लागून दर तीन म्हयन्यांनी सगळ्यांनी हे बसकेचेर नदर दवरली. सामान्य नागरिकांचे प्रस्न सोडोवपाचे नदरेन हाका गती मेळिल्ली. संकल्पना बरी आशिल्ली. हे संकल्पनेंतल्यान गांवगिऱ्या वाठारांतल्या नागरिकांची समस्या सोडोवपा वांगडाच गांवच्या एकंदर उदरगतीची सुरवात सुरू जाली. पूण कांय वर्सां उपरांत ही संकल्पना बंद जाली. सरकारान जनता दरबाराची नवी संकल्पना सुरू केल्या.

समन्वयाचो धागो जाय

लोक आनी प्रशासना मदीं समन्वयाचो धागो तयार करप खूब गरजेचें. आयज लेगीत गांवगिऱ्या वाठारांतले लोक सरकारी अधिकाऱ्यां कडेन वचपाक फाटीं सरतात. कारण ज्या अधिकाऱ्यां कडेन ह्या लोकांचें काम आसा ताका अधिकाऱ्यांचो मूड बरो आसा काय ना हासो भंय आसता. अशी परिस्थिती गोंयांत आयज लेगीत आसा. हाका लागून जायते सामान्य नागरिक सरकारी अधिकाऱ्यां मुखार वचपाक भियेतात. तांचें काम उरता. सरकारान सुरू केल्ली ही संकल्पना उदरगतीचो नवो अध्याय बरोवपाक नक्कीच आदार दितली. एकच म्हत्वाची गजाल म्हणल्यार जनता दरबारांतल्यान सादर केल्ल्या जायत्या सुचोवण्यांक, विनवण्यांक, समस्यांक आनी आडमेळ्यांक सरकार वाट मेकळी करता. गोंय सरकार अंत्योदय तत्वाचेर चलता. अशे तरेचें वाचन मुख्यमंत्री प्रमोद सावंत वारंवार करतात. हाका लागून गांवगिऱ्या वाठारांतल्या लोकांची उदरगत जनता दरबाराच्या पोटांत लिपल्या. कारण सामान्य लोकांची सरकारा कडेन कितें भावना आसा, सरकार सारकें काम करता काय ना. सरकारान हातांत घेतिल्ल्या जायत्या कल्याणकारी येवजण्यांचो फायदो सामान्य मनशा मेरेन पावता काय? गांवगिऱ्या वाठारां खातीर तयार केल्ल्या कल्याणकारी येवजण्यांचो विस्तार सरकारी अधिकारी करतात काय ना. लावार्थ्यांच्या प्रस्तावांक वेळार मान्यताय दिवपा खातीर सरकारी अधिकारी कितले सतर्क आसात. ह्या सगळ्या प्रस्नांची जाप सरकारान सुरू केल्ल्या जनता दरबाराचे नवे संकल्पनेंत आसा.

न्याय मेळपाची गरज

आतां मेरेन नागरिकांनी चार जनता दरबारांतल्यान प्रस्न मांडल्यात. तांकां सगळ्यांक न्याय मेळप खूब गरजेचें. जनता दरबाराक चड वजन दिवपा खातीर आनी लोकांचो विस्वास घटमूट करपा खातीर एक खाशेलो अधिकारी नेमतलों, अशें समाज कल्याण मंत्री सुभाष फळदेसाय हांणी जाहीर केलां. हाका लागून जनता दरबारा वरवीं आतां मेरेन उप्रासिल्ले प्रस्न सुटावे करतना प्रशासकीय वेवस्थेंतल्यो जायत्यो चुको पयस करपाची संद सरकाराक मेळटली. सरकाराचेर आशिल्लो विस्वास आनीक वाडटलो. सरकाराची विस्वासार्हताय वाडटली, हातूंत दुबाव ना. पूण मंत्रीमंडळांनी दिल्लें उतर पाळप तितलेंच म्हत्वाचें. नाजाल्यार 2024 वर्सा जावपी लोकसभा वेंचणुकेचो नदर दवरून अशे प्रयोग करून लोकांची दिशाभूल करपाचो यत्न केल्यार सरकाराची बोट बुडून वतली, हातूंत दुबाव ना.

हाका लागून सरकारान जनता दरबारांतल्यान सुरू केल्ल्या हे नवे संकल्पने खातीर आमी सरकाराक परबीं दिवपाक सोदतात. कारण ह्या जनता दरबरा वरवीं गांवगिऱ्या वाठारांतल्या लोकां मदीं आशिल्ले जायते तरेचे गोंदळ पयस करून तांचे मदीं उर्जा निर्माण करपाची ही संकल्पना. तिचे वरवीं समाजांत नवें चैतन्य उदेंवपाक चड वेळ लागचो ना. हाका लागून सरकारान जनता दरबाराची संकल्पना चड प्रभावीपणान चालीक लायतना कांय प्रमाणांत ती सुदारप, हेंय तितलेंच म्हत्वाचें.

जनता दरबारांतल्यान सुचोवण्यो वा समस्या मांडपाचे आशिल्ल्या नागरिकांक बेगोबेग कागदपत्रां तयार करून संबंदीत खात्याच्या अधिकाऱ्यांक धाडून तांकां प्राधान्य दिवचें अशें सरकारान निर्देश दिवप म्हत्वाचें. तशें जालें जाल्यार सरकारा वयलो लोकांचो विस्वास पारदर्शक जातलो आनी सरकाराचीय प्रतिमा चकचकीत जातली.

उदय सावंत

7972079443