भांगरभूंय | प्रतिनिधी
‘360 वन वेल्थ हुरुन इंडिया रिच लिस्ट 2023’ चो अहवाल
नवी दिल्ली, खबरां संस्था ः रिलायन्स इंडस्ट्रीजचे अध्यक्ष मुकेश अंबानी सगळ्यांत गिरेस्त भारतीय जाल्यात. मंगळारा उजवाडाक आयल्ल्या ‘360 वन वेल्थ हुरुन इंडिया रिच लिस्ट 2023’त अंबानी 8.08 लाख कोटी रुपया संपत्ती घेवन पयल्या क्रमांकाचेर पावल्यात.
हे वळेरेंत गौतम अदानी दुसरे सुवातेर आसात, तांची सध्याची वट्ट संपत्ती 4.74 लाख कोटी रुपया आसा. हिंडेनबर्ग अहवालाक लागून अदानींची वट्ट संपत्ती खूब उणी जाल्या. भारतातली सगळ्यांत गिरेस्त लोकांची हुरुण इंडिया ही वर्सुकी क्रमवारी. सीरम इन्स्टिट्यूट ऑफ इंडिया हे संस्थेचे संस्थापक सायरस एस. पूनावाला 2.78 लाख कोटी रुपया संपत्ती घेवन तिसऱ्या क्रमांकाचेर आसात.
20 वर्सांचो कैवल्य हो सगळ्यांत तरणाटो अब्जाधीश.
हे वळेरेंत वट्ट 259 अब्जाधीश आसात, जे पोरूं परस 38 चड आसात. झेप्टोचे संस्थापक कैवल्य वोहरा (20) हो ह्या वळेरेतलो सगळ्यांत तरणाटो. हुरुण यादी सुरू जाले उपरांत पयलेच खेपे गिरेस्त लोकांची एकठांय संपत्ती 109 लाख कोटी रुपया मेरेन पावल्या. सिंगापूर, युएई आनी साउदी अरेबियाच्या संयुक्त जीडीपी परस हें चड आसा.
गिरेस्त लोकांचे संपत्तींत 8.5% वाड
वळेरेंतल्या गिरेस्त लोकांची एकठांय केल्ली संपत्ती ८.५% वाडली, जाल्यार सरासरी संपत्तींत ९.३% उणी जाल्या. फाटल्या वर्साच्या तुळेंत सुमार 1,054 व्यक्तींची गिरेस्तकाय वाडल्या वा तशीच उरल्या अशेंय अहवालांत म्हणलां. तातूंत 278 नवे चेहरे आसात जाल्यार 264 जाणांची संपत्ती उणी जाल्या आनी 55 जाण वळेरेंतल्यान भायर पडल्या.
भारताचे पयले धा गिरेस्त
| नाव | संपत्ती | बदल (%) | कंपनी |
| मुकेश अंबानी | 808700 | 2 | रिलायन्स इंडस्ट्रीस |
| गौतम अडाणी | 474800 | -57 | अडाणी ग्रुप |
| सायरस पूनावाला | 278500 | 36 | सीरम इंस्टीट्यूट |
| शिव नाडार | 228900 | 23 | एचसीएल |
| गोपीचंद हिंदुजा | 176500 | 7 | हिंदुजा ग्रुप |
| दिलीप संघवी | 164300 | 23 | सन फार्मा |
| एल एन मित्तल | 162300 | 7 | आर्सलर मित्तल |
| राधाकिशन दमानी | 143900 | -18 | एवेन्यू सुपरमार्ट |
| कुमार मंगलम | 125600 | 5 | आदित्य बिर्ला |
| नीरज बजाज | 120700 | 7 | बजाज ऑटो |
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
