भांगरभूंय | प्रतिनिधी
सावथ गोवा युनायटेड क्लबान वेदांत अण्डर 15 यूथ करंड फुटबॉल सर्तीचें वस्तादपण मेळयलें. सिकेटी मैदानाचेर जाल्ले फायनलींत ताणें एफसी गोवाक पॅनल्टी शुटआवटांत 5-4 अशा गोल फरकांनी हारयलो.
मॅचींतले पयलो गोल दुसऱ्या अर्दांत 41व्या मिनटाक सावथ गोवा युनायटेडाच्या आलेक्स फर्नांडीसान केलो. जाल्यार 58व्या मिनटाक सॅम परेरान गोल करून एफसी गोवाक बरोबरीचेर हाडलो.
निर्धारीत वेळांत दोनूय क्लब 1-1 अशे बरोबरींत उरिल्ल्यान निकाल लावपाक पॅनल्टी शुटआवटाचो आदार घेवचो पडलो. सावथ गोवा युनायटेडाच्या शिवा लोहराची शूट दिशाहीन थारली. पूण, अॅल्टन फर्नांडीस, एन्रिक रॉड्रिग्स, जेडन पिंटो, आलेक्स फर्नांडीस हांणी गोल केले. एफसी गोवाच्या केडन रॉड्रिग्साची शूट सावथ गोवा युनायटेडाचो गोलकीपर रिस बार्रेटोन आडायली. उपरांत लेस्विन रिबेलो आनी फ्रेडन मॅण्डिस हांणी गोल केल्या उपरांत सॅम परेराची शूट चुकली आनी एफसी गोवा हारलो.
इनामां भेटवण सुवाळ्याक गोंय फुटबॉल संघटनेचे अध्यक्ष कायतान फर्नांडीस, वेदांता सेझा गोवाचे निलेश झोरे, पद्मश्री ब्रह्मानंद शंखवाळकार, ‘अवेस’चे अध्यक्ष डॅरिक परेरा, उपाध्यक्ष आवेर्तान फुर्तादो हे उपस्थीत आशिल्ले.
वैयक्तीक इनामांः बेळगांव युनायटेड (शिस्तीचो क्लब), रिस बार्रेटो (उत्कृश्ट खेळगडो, सावथ गोवा युनायटेड), गौरव शेट्टी (गोलकीपर, एफसी गोवा), सॅम परेरा (मिडफिल्डर, एफसी गोवा), केडन रॉड्रिग्स (डिफॅण्डर, एफसी गोवा), जेडन पिंटो (फॉरवर्ड, सावथ गोवा युनायटेड).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
