भांगरभूंय | प्रतिनिधी
पिलार वयल्या फादर आग्नेल म्हाविद्यालयाच्या पंगडान गोंय विद्यापिठान घेतिल्ले दादल्यांच्या आंतरम्हाविद्यालयीन फुटबॉल सर्त जिखली. फायनलींत ताणें नावेलीच्या रोझरी म्हाविद्यालयाच्या पंगडाक 3-0 अशा गोल फरकांनी हारयलो.
मॅच नावेलीच्या रोझरी मैदानाचेर जाली. पुर्वार्धांत पांच मिनटांच्या अंतरान दोन गोल करून आग्नेल म्हाविद्यालयान मॅचीचेर आपली पकड घट केली. साईश गांवसान फ्रि किकीचेर गोल करून 40व्या मिनटाक आघाडी मेळोवन दिली. उपरांत सचिन म्हार्दोळकारान 45व्या मिनटाक गोल केल्ल्यान मध्यांतरा मेरेन आग्नेल 2-0 असो मुखार आशिल्लो. 64व्या मिनटाक विशेश नास्नोडकारान केल्ल्या गोला नेटार फादर आग्नेल म्हाविद्यालयाचें जैत निश्चीत जालें. सर्तींतलो उत्कृश्ट खेळगड्याचो पुरस्कार विशेशाकूच फावो जालो.
इनामां भेटवण सुवाळ्याक भारताचे आदलो फुटबॉल मुखेली पद्मश्री ब्रह्मानंद शंखवाळकार, रोझरी म्हाविद्यालयाचे प्राचार्य हॅलिक बार्रेटो, फादर आग्नेल म्हाविद्यालयाचे प्रभारी प्राचार्य डॉ. फादर फ्रॅड्रिक रॉड्रिग्स, गोंय विद्यापिठाचे शारिरीक शिक्षण आनी खेळां सहाय्यक संचालक भालचंद्र जदार उपस्थीत आशिल्ले.
फादर आग्नेलाच्या पंगडांत नुद्रेश कुट्टीकार, सचिन म्हार्दोळकार, केनी रॉड्रिग्स, अश्विन फर्नांडीस, जोहान मिस्किता, दिप्तेश खांडेपारकार, तेज थापा, अलरिको कार्दोझ, लेस्टन बार्रेटो, नोलान पो, ऑस्कर ब्रागांझा, विशेश नास्नोडकार, मोहित सांतोंडेकार, ओमकार नार्वेकार, शुबर्ट बोर्जिस, साईश गांवस, अॅनरिक डायस, साईल आरोसकार, अॅन्सेल दो रेगो आनी गौराज कुंकळकार हांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
