भांगरभूंय | प्रतिनिधी
बांगलादेशाक 137 धांवड्यांनी हारोवन सध्याचो वस्ताद इंग्लंडान चालू आशिल्ले संवसारीक वन डे क्रिकेट सर्तींत जैताचें खातें उगडलें. टॉस हारल्या उपरांत पयलीं बॅटिंग करतना इंग्लंडान धांवड्यांचो दोंगर उबारलो. 365 धांवड्यांचो फाटलाव करतना बांगलादेशाक घाम आयलो.
लिटन दास (76) आनी मुशफिकर रहिम (51) हांकां सोडले जाल्यार एकाय बांगलादेशाच्या बॅट्समनाक व्हड खेळी करपाक जमली ना. अखेर 48.2 ओव्हरींनी 227 धांवड्यांचेर बांगलादेशाचो डाव सोंपलो आनी इंग्लंडान व्हड जैत जोडलें. रीस टॉप्लेन सगल्यांत चड 4 विकेटी घेवन बांगलादेशाचो डाव गडगडावन उडयलो. ताचे खेरीत क्रिस वोक्सान दोन विकेटी मेळयल्यो.
ते पयलीं बॅटिंग करपी इंग्लंडाच्या डॅव्हिड मलानान सगल्यांत चड 140 धांवड्यांची खेळी केली. जाल्यार जॉनी बॅयरस्टो (52) आनी जो रुटाक (82) अर्द शेंकड्यांची खेळी करपाक येस आयलें. बांगलादेशा वतीन मेहदी हसनान सगल्यांत चड चार विकेटी घेवन इंग्लंडाच्या पंगडाक कशे तरेन 364 धांवड्यां मेरेन आडायलो. ताचे खेरीत शोरफुल इस्लाम (3) आनी तस्किन अहमद आनी शाकिब अल हसन हाणें दरेकी एक विकेट घेतली.
इंग्लंडाक उक्तावणाचे मॅचींत न्युझिलॅण्डा कडल्यान हार घेवची पडिल्ली, ताका लागून बांगलादेशा आडची मॅच इंग्लंडा खातीर म्हत्वाची आशिल्ली. डॅव्हिड मलानान आक्रमक सुरवात करून दिल्या उपरांत सगल्याच इंग्लंडाच्या बॅट्समनान हात धुवन घेतले आनी बांगलादेशा मुखार धांवड्यांचो दोंगर उबारलो आनी व्हड जैत लेगीत मेळयलें. ताणें 12 चवके आनी दोन सक्यांचे मजतीन 91 बॉलांनी शेंकडो पुर्ण केलो.
उक्तावणाचे मॅचींत हार घेतल्या उपरांत इंग्लंडाची नेट रनरेट (-2.149) सामकी उणी जाल्ली. पूण, कालचे व्हड जैता उपरांत इंग्लंडाक थाकाय मेळ्ळी. कारण ताची नेट रनरेटींत व्हड वाड जाली. ताची रन रेट +0.553 अशी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
