भांगरभूंय | प्रतिनिधी
नोट बंदी वेळार लोकांच्या हातांत आयिल्ल्यो 2000 रुपयांच्यो नोटी आतां आदल्या काळांत खंय तरी शेणटल्यो. सरकारान त्यो वापरांतल्यान काडून घेतल्यात. भारतीय रिझर्व्ह बँकेन लोकांक 7 ऑक्टोबर मेरेन बँकां कडल्यान 2000 च्यो नोटी बदलपाक वेळ दिल्लो. जर तुमकां आजूनय नोटी बदलपाक मेळूंक ना जाल्यार भियेवपाची गरज ना. तुमी अजूनय देशांतल्या 19 शारांनी दोन हजारांच्यो नोटी बदलपाक शकतात. जाचे विशीं तुमकां हांगा पुराय म्हायती मेळटली.
सरकारान 2000 च्यो नोटी चलनांतल्यान काडल्यात तरी त्यो अजूनय कायदेशीर मुद्रा आसात. हाचो अर्थ कायदेशीर रितीन नोटी अजूनय बेकायदेशीर जावंक नात. आरबीआयच्या प्रादेशीक कार्यालयांनी अजूनय ह्यो नोटी अदलाबदल करूं येतात.
देशांतल्या 19 शारांनी आरबीआयचीं प्रादेशीक कार्यालयां आसात. लोकांनी आपल्यो 2000 रुपयाच्यो नोटी हांगा बदलूं येतात. तुमी ह्या शारांनी रावतात जाल्यार तुमी व्यक्तिगत रितीन ऑफिसांत वचून तुमच्यो नोटी बदलपाक शकतात. तशेंच इंडिया पोस्टा वरवीं आरबीआय कडेन नोट धाडपाचोय पर्याय तुमकां आसा.
ही आसा तीं शारां
अहमदाबाद, बेंगळुरू, बेलापूर, भोपाळ, भुवनेश्वर, चंदीगड, चेन्नय, गुवाहाटी, हैदराबाद, जयपूर, जम्मू, कानपूर, कोलकात्ता
लखनौ, मुंबय, नागपूर, नवी दिल्ली, पाटणा, तिरुवनंतपुरम
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
