भांगरभूंय | प्रतिनिधी
ल्हान सुकण्यान समजून घेवप म्हत्वाचें की तें ल्हान सुकणें. आपूण कावळो न्हय आनी गरुड लेगीत न्हय. ल्हान सुकण्याक जिणेंत ल्हान सुकण्या सारकीच अपेक्षा आसत जाल्यार अपेस, निराशा आनी सगळ्यांत म्हत्वाचें म्हणल्यार अपमान घडचें ना. काळा प्रमाण परिस्थिती बदलता आनी मनशाक ताचे प्रमाण बदलचो पडटा, बदल मान्य केल्यार कसलोच त्रास जायना. तेच प्रमाण पोरण्या पेलवानाग तरणाट्या पेलवाना कडेन झगडपाची इत्सा आसल्यार ताका उपरांत अपेस आनी निराशा येवंक शकता. मन समाधान जालें जाल्यार तोंडार सदांच सुखी हांसो आसूं येता.
मागीर सुख म्हणल्यार आनीक कांयच न्हय. ती मनाची स्थिती. आनी ती मेळ्ळी जाल्यार तोंडार सदांच हांसो येवंक शकता. सगळो वेळ सुखी रावपाक सगळ्यांत पयलीं विचार बरे आसूंक जाय. संवसाराचेर आशिल्ली नदर निरपेक्ष आनी सकारात्मक आसूंक जाय. आमी चड अपेक्षा करतात आनी ती पुराय जाली ना जाल्यार निराश जातात. मागीर दुख्खांत पडटात. आनी सगळ्यांत म्हत्वाचें म्हणल्यार जेन्ना आमी मेळटा ताचेर समाधान जावपाची कला शिकतात तेन्ना आमकां कसलेंच दुख्ख दिसना. हांगा सुखाचो मार्ग स्पश्ट जाता.
संवसार चड धांवता अशें दिसता म्हणून आमी चड वेगान बसूंक फावना. दुख्खाच्या फातरांनी लेगीत आमी सुखाचे फातर सोदूंक जाय. निमाणें सुख आनी दुख्ख दोनूय आमचेर आदारून आसता. सुख, दुख्ख, राग, लोभ, येस, अपेसाक फावो तें म्हत्व दिवचें न्हय. जिणेंतली सगळ्यांत म्हत्वाची गजाल म्हळ्यार जिवीतच. सदांच सुखी रावपा खातीर तुमी सुख उणें करपाक जायना. खंयचेय परिस्थितींत तुमचें मन सुखी उरपाक जाय. आतां जेन्ना -जेन्ना आमी भोंवडेर वतात वा प्रिय व्यक्तीक मेळपाक वतात तेन्ना आमची कूड खूब उत्सुक आसता. देखून आमी त्या सगळ्या गजालींचो मोग करतात. दुसरे वटेन आवडनात तीं कामां करतना आमी निराश जातात. म्हणल्यार सदांच उर्बेभरीत रावपाक आमचें काम पुराय मनान करचें, म्हळ्यार तें करतना आमी खुशाल आसूंक जाय. ल्हान- ल्हान गजालींनीय खुशाल आसूंक जाय, जाका लागून आमची कूड उर्बेभरीत जावंक शकता.
कोण कितें म्हणटा ताचे कडेन आडनदर करप गरजेचें, मन खोशी करपा खातीर स्वताची दुसऱ्यां कडेन केन्नाच तुळा करची न्हय. देखून जिवीत कितलें अद्भुत आसा तें तुमकां कळटलें. दुसऱ्याच्या सुखांत सामील जायात. हो एक छंद वाडोवंक जाय.
सुख सगळ्यांक मेळटा. पूण आयज लोकांक मजा करपाक चड वेळ मेळना. म्हाका पळोवन लोक कितें म्हणटले हाचो विचार करप बंद करुंक फावो. त्या वेळार आपल्याक आवडटा तें करचें. त्या वेळार कार्टून पळोवपाक वा बागकाम करपाक आवडटा जाल्यार ताचो आनंद घेवचो. मागीर तीं कामां तुमी नक्कीच करपाक जाय. ते खातीर आमी विशिश्ट पिरायेचेर आसल्यारूच तें करचें असो खाशेलो नेम कुशीक दवरचो आनी आवडीच्या विशयाचेर लक्ष केंद्रीत करून तें सुख सहज मेळोवपाचो यत्न करचो. व्हडल्या गजालींचो आनंद घेवचे परस ल्हान- ल्हान गजालींचो आनंद घेयात आनी थोडें लेगीत स्वताचेर खोशी जावपाक शिकात. सतत उमेदीन आनी सकारात्मक रावप ही एक स्थिती आनी ताका आजीवन सराव जाय पडटा.
गौरी भालचंद्र
9422373926
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
