खेळ शक्ती जावपाचे वाटेर !

भांगरभूंय | प्रतिनिधी

आशियाई खेळां सर्तींत अशे खूबशे खेळगडे आसात की जांणी स्वताची वेगळी वळख देशाक करून दिल्या. रामबाबू जाल्यार निश्चीतपणान हिरो थारला.

आशियाई खेळां सर्तींत भारतीय खेळगड्यांनी जी चमक दाखयली ताची अपेक्षा आमी सर्वसामान्य लोकांनी क्वचितूच
केल्ली. पूण हो नवो भारत आसा हाची प्रचिती खेळा मळारूय चीनांतल्या इतिहासीक कामगिरीन केल्या. चीनांत हांगझू हांगा हालींच सोंपिल्ल्या 19 व्या आशियाई खेळां सर्तींत आमच्या खेळगड्यांनी जो इतिहास रचलो तो पळयत जाल्यार संवसारीक खेळां मळार आतां मेरेन फाटीं दिसपी भारतान संवसारीक खेळां नकशाचेरूय फुडारांत ठळक स्थान आसतलें हाचेच संकेत दिल्यात अशें म्हणूंक येतलें. नवी दिल्लींत हालींच सोंपिल्ल्या जी-20 गटांतल्या देशांच्या वैश्वीक संमेलनांत राजकी नदरेन एका नव्या भारताचो जाल्लो उदय संवसारान पळयलो. उपरांत चीनांत जाल्ल्या आशियाई खेळां सर्तींत आतां मेरेनचें सर्वश्रेश्ठ अशें प्रदर्शन भारतान केलें आनी खेळां मळारूय भारता कडेन पळोवपाची नदर फुडारांत संवसाराक बदलची पडटली हाचेच संकेत दिले.
देशांत संवसारीक क्रिकेट सर्त सुरू जाल्या आनी आशियाई खेळां सर्तींतली दोळे दिपकावपी येसाची फाटभूंय ताका मेळ्ळी. ताका लागून ताचे पसून प्रेरीत जावन रोहीत शर्माच्या भारतीय पंगडा कडल्यान संवसारीक क्रिकेट सर्तूय तिसरे फावटी जिखपाची कामगिरी जावची अशीच आस्त भारतीय पळयतात. आशियाई खेळां सर्तींतले क्रिकेट सर्तींत दादले आनी बायलां ह्या दोनूय गटांनी जबरदस्त प्रदर्शन करून भारतान भांगरां पदकां जोडल्यांतूच. पूण संवसारीक करंड जिखून क्रिकेटींतलें भारताचें श्रेश्ठत्व वादातीत आसा हें रोहीत शर्मा आनी ताच्या पंगडांतल्या खेळगड्यांनी सिद्ध करपाचें आसा. पयलेच मॅचींत प्रतिकूल परिस्थितींत लेगीत भारतीय पंगडान बळिश्ट ऑस्ट्रेलियेचेर केल्ली मात पळयत जाल्यार संवसारीक करंड आमीच जिखूं असो विस्वास दरेक भारतीयाक दिसता.
आशियाई खेळां सर्तींतले इतिहासीक कामगिरीन भारता कडेन खेळां मळारूय संवसारीक महाशक्ती जावपाची तांक आशिल्ल्याचें आमच्या खेळगड्यांनी खेळाच्या खूबशा प्रकारांनी दोळे दिपकावपी कामगिरी करून दाखोवन दिलां. अमेरिका, चीन, जपान, द. कोरिया अशा खूबशा देशांच्या शेकांत खेळां मळार आतां मेरेन आमी फाटींच आशिल्ल्याचें चित्र फाटल्या तीन चार दसकांनी दिसून येतालें. ऑलिम्पिकांत हॉकींत भागरां पदक हेंच आमचें एकसुरें लक्ष्य आसतालें आनी हेर देश खोऱ्यांनी भांगरा पदकां जिखत आसतना हॉकीतलें एकूच भांगरा पदक मेळ्ळें तरी आमी ऑलिम्पीक जिखलें अशे तरेन आमी जैत मनयताले. कुस्ती, कबड्डी आदीं आमच्या परंपरीक खेळांतूय हेर कांय देशांनी बरी प्रगती केल्ल्यान थंय लेगीत आमी फटीं पडत आशिल्ल्याचें दिसून येता. आशियाई खेळां सर्तींत ते तुळेन आमी थोडीभोव चमक हालींच्या काळांत दाखोवंक लागिल्ले, पूण चीन, जपान, द. कोरिया तशेंच हेर कांय देशांनी आमकां एकूण सत्तरेक पदकांच्या मुखार केन्नाच वचूंक दिवंक नाशिल्लें. जकार्ता हांगा जाल्ल्या फाटल्या खेळां सर्तींतूच सत्तरेक पदकां मेळयतना आमकां बरीच खरस काडची पडिल्ली. ह्या वेळार मात चीनांत वेगळें चित्र पळोवंक मेळ्ळें. चीनाच्या खेळां अधिकाऱ्यांनी खूबशा खेळांनी भारतीय खेळगड्यांचे पांय फाटीं ओडपा खातीर सगले कारनामे करून लेगीत आमच्या खेळगड्यांनी पदकांचो आंकडो शंबरा वयर तर व्हेलोच, पूण तेच बरोबर वट्ट 28 खेळां प्रकारांत आशियांत भारतूच श्रेश्ठ आशिल्ल्याचें सिद्ध करीत चीनाक, जपानाक सौम्य आसूं पूण धपको दिलो.
आशियाई खेळां सर्तींतली भारताची जोड 28 भांगर, 38 रुपें आनी 41 कांश्यां पदकां अशी आसा. जकार्तांतल्या आशियाई सर्तींतले कामगिरीचे तुळेन आमी सुमार 50 टक्क्यां परस चड पदकां जिखलीं आनी तातूंत विशेश म्हणल्यार भांगरा पदकांची संख्या 16 वयल्यान सुमार 27 चेर पावयलीं. हाचे वेल्यानूच भारताच्या खेळांतलो जो जोश ह्या वेळार दिसून आयलो तो खूब म्हत्वाचो थारता आनी होच जोश आमकां एक दीस खेळांतली महाशक्ती जावंक दितलो हाचो विस्वास दिसता. आशियाई खेळां सर्तींत खेळिल्ल्या खेळांची तुळा क्रिकेटी कडेन करूंक येवची ना. क्रिकेटीन एक वेगळीच उंचाय आयज गांठल्या. तरी ह्या खेळाचेरूय सामान्यांतल्या सामान्य अशा खूबशा भुरग्यांनीय आपली म्होर उमठयिल्ल्याचें आमी पळयतात. क्रिकेटीक गिरेस्तकाय आनी संपन्नतायेचें वलय लाभलां. क्रिकेट खेळगडे कोट्यांनी रुपयांची उड्डाणां करीत आसात. आयपीएलाची एका वर्साची कबलात जाली जाल्यार खेळगडे मालामाल जावंक शकतात, पूण आशियाई खेळां सर्तींत अशेय खेळ आसात की जंय मोलमजुरी करपी एखादो रामबाबू लेगीत देशाचो हिरो थारता, पूण ते तुळेन ताच्या पदरांत कांयच पडना. ही परिस्थिती बदलूंक जाय जाल्यारूच खेळांत भारत अजून खूब मुखार वचूंक शकतलो. 35 किलोमिटर चलपाचे सर्तींत कांश्या पदक मेळोवन दिवपी रामबाबू मनरेगाचो मजूर म्हूण काम करतालो. वेटर म्हणून लेगीत ताणें काम केलां. पाचवीक पुजिल्ले गरिबी कडेन संघर्श करतना ताका ही संद मेळ्ळी आनी ताणें ताचें भांगर केलें. 140 कोटींच्या ह्या देशांत अशे खूबशे रामबाबू मेळटले की ते खेळाच्या खूबशा प्रकारांनी चीन, जपानच्या खेळगड्यांकूय फाटीं उडोवंक शकतले. आयज गरज आसा ती अशा गुणेस्तांचो सोद घेवन तांकां तरबेज करपाची.
आशियाई खेळां सर्तींत अशे खूबशे खेळगडे आसात की जांणी स्वताची वेगळी वळख देशाक करून दिल्या. रामबाबू जाल्यार निश्चीतपणान हिरो थारला. तेच बरोबर हेर कांय जाणांची नांवां घेवपाची जाल्यार अविनाश साबळे, मुरली श्रीशंकर, ओजस, कुस्तीगीर पंघाल अशी खूबशा जाणांची घेवं येता. हांगझू हांगा चीनाच्या नाकार पांय दवरून आमच्या ह्या खेळगड्यांनी मेळयिल्ल्या येसांतल्यान फुडारा खातीर खूब कितें शिकूंक येतलें, आनी ते खातीर आतां सावनूच यत्न करूंक जाय. चीन, जपानाचे तुळेन आमी खेळगड्यांक अत्याधुनीक सुविधा उपलब्ध करून दिवपाक खूब फाटीं आसात हें मानचेंच पडटलें. खेळां संस्कृतीचो प्रसार आतांच खंय जावंक लागिल्ल्याचें जाणवता. आशियाई सर्तींत मेळयिल्लें येस पळयत जाल्यार ऑलिम्पिका खातीर आमचें स्थान नेमकें खंय आसा हाची लेगीत कल्पना करूं येता. ऑलिम्पिकाचें आव्हान स्विकारून आमी फुडली वाटचाल निश्चीतपणान करूंक जाय. आमचें चिनांतले येस निश्चितूच तोखणायेचें आसा. पूण तेच बरोबर हेंवूय लक्षांत दवरचें पडटलें की चीनान एकल्यानूच सुमार पावणदोनशें भांगरा पदकां जिखल्यांत. ज्या वेळार ऑलिम्पिकांत भारतीय खेळगडे आपली म्होर उमठायतले तोच खरो भांगराचो खीण आसतलो. आशियाई सर्तींतलें येस आमकां त्या मार्गान व्हरपाक उपेगी थारूंक शकता आनी तेच बरोबर खेळां संस्कृतीचो अदीक प्रसार, विकास जावपाकूय मोलादीक वांटो उबारूं हातूंत दुबाव ना. आयच्या काळांत भारत कितलो सामर्थ्यशील जाला हें निश्चीत करतना खेळाच्या मळारूय कामगिरीचो विचार जाता हें लक्षांत दवरूनच ही घोडधांव चालूच दवरली जाल्यार खूब कितें साध्य करूं येतलें.

वामन प्रभू
9823196359