भांगरभूंय | प्रतिनिधी
संवसारीक वन डे क्रिकेट सर्तीची दुसरी मॅच पाकिस्तान आनी श्रीलंका ह्या पंगडां मदीं हांगाच्या राजीव गांधी आंतरराष्ट्रीय स्टेडियमाचेर जातली.
पाकिस्तानान आपले पयले मॅचींत नॅदरलॅण्डाक हारयला जाल्यार श्रीलंकेक दक्षीण आफ्रिके आड हार घेवची पडल्या. श्रीलंका मॅच हारलो आसलो तरी ते मॅचींत ताणें बरें प्रदर्शन केल्लें. दोनूय पंगड फॉर्मांत आसा, ताका लागून आयज उमळशीक वाडोवपी मॅच प्रेक्षकांक पळोवपाक मेळुये.
राजीव गांधी आंतरराष्ट्रीय स्टेडियमाची खेळपट्टी ही फास्ट बॉलरांक अनुकूल अशी आसता. पूण, मॅच जसजशी मुखार वता स्पिनर लेगीत मॅचींत आपली मुखेल भुमिका वठोवपाक लागतात. बॅट्समनांक लेगीत ही खेळपट्टी मजत करता.
ह्या मैदानाचेर अजून मेरेन आठ वन डे मॅची जाल्यात. हातूंतल्या पांच मॅचींनी पयलीं बॅटींग करपी पंगड जिखल्यात. जाल्यार तीन मॅचींनी उपरांत करपी पंगड जिखल्यात. ताका लागून टॉस जिखपी पंगड पयलीं बॅटींग करपाक इत्सूक आसतलो. पयल्या डावांतलो सरासरी स्कोर 288 आसा, जाल्यार दुसऱ्या डावांतलो सरासरी स्कोर 262 आसा.
पाकिस्तान आशिया करंड क्रिकेट सर्तींत मेळिल्ले हारीचो बदलो लेगीत घेवपाक इत्सूक आसतलो. फाटल्या म्हयन्यांत जाल्ले आशिया करंड सर्तींत श्रीलंकेन पाकिस्ताना हारयिल्लो. हे हारीक लागून पाकिस्तानाचें फायनलीत पावपाचें सपन भंगिल्लें.
एकामेका आड खेळिल्ल्या वट्ट वन डे मॅचींचेर नदर मारली जाल्यार पाकिस्तानाचेंच दालें जड दिसता. दोनूय पंगड वट्ट 156 मॅचींनी एकामेका आड खेळ्ळ्यात. तातूंतल्यो 92 मॅची पाकिस्तानान जिखल्यात, जाल्यार श्रीलंकेन 59 मॅची जिखपाक येस मेळयलां. चार मॅची टाय उरल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
