भांगरभूंय | प्रतिनिधी
मडकय: फोंडें म्हाल मर्यादीत कार्यकारी समिती आनी म्हाल मर्यादीत शाळा समूह समिती हांच्या जोड पालवान आयोजीत केल्ल्या फोंडें म्हालांतल्या निवृत्त शिक्षकांचो भोवमान केलो.
ह्या वेळार माचयेर मुखेल सोयरे म्हूण डॉ. राजेंद्र देव आनी विपीन शेट सिरसाट हे मानाचे सोयरे म्हूण हाजीर आशिल्ले. तशेंच आल्मेदा हायस्कुलाचे उमा कुंकळकार, अमिता तळावलीकार आनी सरस्वती हायस्कुलाचे मुख्याध्यापक सुदेश पारोडकार तशेंच अध्यक्ष फोंडें म्हाल मर्यादीत शाळा समूह समिती हाजीर आशिल्ली.
कार्यावळीची सुरवात सरकारी मुळावी शाळेच्या शिक्षिकेन गायिल्ल्या पदान जाली. संगीता गुले हांणी हार्मोनियमाचेर आनी संतोष गांवकार हांणी तबल्याचेर साथ संगत केली.
सुदेश पारोडकार हांणी येवकार दिवन प्रास्तावीक केलें. ज्योत्सना वझे हांणी सोयऱ्यांची वळख करून दिली आनी फुलांची रोंपा भेट म्हूण दिली.
जीं भुरगीं मदींच शाळा सोडटात तांकां योग्य ते मार्गदर्शन करून तांकां योग्य मार्गार येवपा खातीर निवृत्त शिक्षकांनी मजत करची अशें विपीन शेट सिरसाट हांणी आपल्या उलोवपांत सांगलें.
मुखेल सोयरे डॉ. राजेंद्र देव हांणी निवृत्त शिक्षकांनी 60 वर्सा पुराय केल्ले खातीर आनी बरे भलायके खातीर अभिनंदन केलें. निवृत्त जाले म्हूण शिक्षकांची जबाबदारी सोंपना जाल्यार ती अजून वाडटा. तांणी तयार केल्ल्या विद्यार्थ्यांक आनी समाजाक योग्य तो मार्ग दाखोवचो अशें आवाहन केलें.
डॉ. राजेंद्र देव आनी वितीन शेट सिरसाट हांचे हस्तुकीं निवृत्त शिक्षकांचो भोवमान केलो. ह्या वेळार 38 निवृत्त शिक्षकांचो भोवमान केलो. प्रकाश नायक आनी अनिता बांदोडकार हांणी भोवमानाक जाप दिली.
ज्योत्सना वझे, प्रतिभा नायक आनी नाजनीन खान हांणी सुत्रसंचालन केलें. मृणाल नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
