भांगरभूंय | प्रतिनिधी
विधानसभा वेंचणुकांची तारीख जाहीर; ३ डिसेंबराक ‘आबेर्तुल’
नवी दिल्ली, खबरां संस्था: मध्यप्रदेश, छत्तीसगड, राजस्थान, मिझोरम आनी तेलंगण ह्या पांच राज्यांच्या विधानसभा वेंचणुकांची तारीख आयज जाहीर जाली. ह्या पांचूय राज्यांच्या वेंचणुकेचें आबेर्तुल ३ डिसेंबराक जातलें. ही सोर्त कोणाक फुट्टा, ताचे कडेन पुराय देशाचें लक्ष लागून आसतलें.
केंद्रीय वेंचणूक आयोगान आयज दिल्लींत जाल्ले पत्रकार परिशदेंत वेंचणुकांच्यो तारखो जाहीर केल्यो. मध्यप्रदेशांत १७ नोव्हेंबर, छत्तीसगडांत ७ आनी १७ नोव्हेंबर अशी दोन पांवड्यांनी, राजस्थानांत २३ नोव्हेंबर, मिझोरमांत ७ नोव्हेंबर आनी तेलंगणांत ३० नोव्हेंबराक मतदान जातलें.
ह्या पांचूय राज्यांत सोळा कोटी परस चड मतदार आसात. ६७९ जाग्यांचेर मतदान जातलें. ६० लाख युवा मतदार पयलेच फावट मतदान करतले. मतदाना खातीर नोंदणी करप्यां मदीं बयलांचो आंकडो चड आसा. आदिवासी वाठारांत मतदान केंद्राची वेवस्था केल्या. ज्येश्ठ नागरिकांक ‘वोट फ्रॉम होम’ करपाक मेळटलें. बेगीनूच पांचूय राज्यांनी आचारसंहिता लागू करतले. मिझोरामांत साडे आठ लाख, छत्तीगडांत २.०३ कोटी, मध्य प्रदेशांत ५.६ कोटी, राजस्थानांत ५.२५ कोटी आनी तेलंगणांत ३.१७ कोटी मतदार मतदान करतले.
वेंचणुकेचो निकाल ३ डिसेंबराक जातलो. ८.२ कोटी दादले मतदार आसात. १७ ऑक्टोबराक मतदान वळेरी प्रसिद्ध जातली. २३ ऑक्टोबरा मेरेन मतदान वळेरी सुदारपाची संद मतदारांक मेळटली. १७,७३४ मॉडेल मतदान केंद्रां आनी ६२१ मतदान केंद्रांच्या वेवस्थापनाची जापसालदारकी पीडब्ल्यूडी कर्मचार्यांचेर आसतली. बायलां ८,१९२ मतदान केंद्रांची जापसालदारी सांबाळटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
