भांगरभूंय | प्रतिनिधी
भांगरभूंय । खेळां मेज
पणजीः दुसरे आयर्नमन 70.3 इंडिया सर्त आंध्रप्रदेशाच्या निहाल बेगान सेगीत दुसरे फावट जिखली. बायलांच्या गटांत दक्षीण आफ्रिकेच्या टोनी स्नोशेल हिणे पयली सुवात मेळयली. निहालान मिरामार सावन सुरू केल्ली ही सर्त 04. 32. 05 ह्या वेळांत लक्ष्य पार केलें. मणिपूराच्या एल बितेन सिंगान दुसरें आनी मणिपूरच्याच बिश्वरजीत सायखोमान तिसरी सुवात मेळयली.
बायलांच्या गटांत टोनी स्नोशेलान 05.09. 10 ह्या वेळाची नोंद केली. चेक रिपब्लिकाचें तातियाना प्लायासुनोव्हान दुसरी आनी कर्नाटकाच्या टीमटीम शर्मान तिसरी सुवात मेळयली. आयतारा सकाळी मिरामार दर्या वेळेर मुख्यमंत्री डॉ प्रमोद सावंत हांणी बावटो दाखोवन सर्तीक सुरवात करून दिली. भारता सयत 30 देशांचे खेळगडे वांटेकार जाल्ले.टीम अरायज परफॉर्मन्स इंडिया, टी टीबी एक पायोनियर आनी टी टीबी एस वॉरियर्स हे रिले पंगड रिले गटांत अव्वल थारले.
पेंवप, सायकल चलोवप आनी धांवप हाचे संजोजन आशिल्ली संवसारीक पांवड्या पयली ही सर्त भारतांतली सगल्यांत व्हड आंतरराष्ट्रीय ट्रायथलॉन आसा. खेळगड्यांनी मिरामार दर्या वेळे साव 1.9 किमी पेंवून ताचे सर्तीक सुरवात केली. उपरांत 90 किमी सायकल रायड आनी मिरामार सर्कल सावन 21.1 किमी धांवून सर्त पुराय केली. न्यूझिलंडांत जावपी आयर्नमन 70.3 वर्ल्ड चॅम्पियनशीप सर्तींत वांटो घेवपा खातीर पयल्या 30 फिनिशर पात्र थारल्यात.
सर्तीत वांटेकार जावपा खातीर युके, अमेरिका, रशिया, बोलिव्हिया, दक्षीण आफ्रिका, अर्जेंटिना, एस्टोनिया आनी न्य़ूझिलंडातल्या सर्तक आयिल्ले. सर्तींत महाराष्ट्र, कर्नाटक, हरियाणा आनी मणिपूरच्या सर्तकांचें वर्चस्व दिसून आयलें. 150परस चड बायलो सर्तींत वांटेकार जाल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
