भांगरभूंय | प्रतिनिधी
खबरां संस्था
हांगझोऊः आशियाई खेळां सर्तींत (एशियाड) भारतान पयलेच फावट इतिहासीक प्रदर्शन करून देशाच्या 72 वर्सांच्या एशियाड इतिहासांत वट्ट 107 पदकां जिखलीं. तातूंत 28 भांगराचीं, 38 रुप्याचीं आनी 41 कांस्या पदकांचो आसपाव आसा. 37 वर्सां उपरांत पदकांचे वेळेरेत भारतांत पयल्या टॉप पांचांत सुवात मेळयली. चीन, जपान, दक्षीण कोरिया उपरांत भारताक चवथी सुवात फावो जाली. 23 सप्टेंबर तें 8 ऑक्टोबर मजगतीं जाल्ले हे सर्तींत एशियाड 2022 चो येजमान चीनान 201 भांगरा पदकां, 111 रुप्या पदकां आनी 71 कांस्या पदकां मेळोवन पयली सुवात मेळयली.
100 पदकांचें लक्ष्य
आशियाई खेळ सुरू जावचे पयलीं भारतीय ऑलिम्पीक असोसिएशनान (आयओए) 100 पदका जिखपाचें लक्ष्य थारायल्लें. आयओची अध्यक्ष पीटी उषान खेळगड्यांक उर्बेभरीत करून तांकां ‘इस बार सौ पार’ व्हो नारो दिल्लो. भारतीय पंगडांतल्या 653 खेळगड्यांनी 100 पदका जिखून पीटी उषाचे शब्द खरे करून दाखयले. भारतान वट्ट 107 पदकां जिखून दाखयलीं. 72 वर्सां उपरांत एशियाडांतलें भारताचें हें सगल्यांत बरें प्रदर्शन थारलें. 2018 वर्साच्या एशियाडांत भारतान 70 पदकां मेळयल्ली. हे खेपे बारा खेळगड्यांनी आनीक 37 पदकां जिखून आपलो रिकॉर्ड चड बरो केलो.
विक्रम तोडपाक 68 वर्सा
1951 वर्सा नवी दिल्लींत पयले फावट एशियाड खेळ जाल्लो. तेन्ना भारतान 15 भांगरा पदकां जिखून पदकाचें वळेरेंत दुसरी सुवात मेळयल्ली. 15 भांगरा पदकांचो व्हो विक्रम तोडपाक भारताक 68 वर्सां लागलीं. 2018 वर्सा 16 भांगरा पदकां मेळयल्ली. पांच वर्सां उपरांत भारतान 28 भांगरा पदकां मेरेन मजल मारल्या. भारताच्या दादले आनी बायल खेळगड्यांनी भारताच्या इतिहासीक येसांत बोरोबोरची कामगिरी केली. 107 पदकांतली 43 टक्के म्हणल्यार 46 पदकां बायल खेळगडींनी देशाक मेळोवन दिली. 48 टक्के पदकां 52 दादल्यांनी मेळयलीं. 9 पदकां मिक्स खेळां प्रकारांत मेळ्ळी.
आर्चरी, एथलेटिक्स, क्रिकेट, कबड्डी, शूटींग आनी स्कॉशांत भारतीय बायलांनी बरी प्रगती केल्ल्याचे एशियाड उपरांत दिसून आयलें. दादल्यांनी ह्या खेळा भायर बॅडमिंटन, हॉकी आनी हॉर्स रायडींक भारतान इतिहासीक कामगिरी करून दाखयली. नेमबाजींत भारतीय शूटर्सांचे प्रदर्शन इतिहासीक थारलें. तातूंत देशाक सगल्यांत चड 7 भांगरा पदकां मेळ्ळीं. नेमबाजींत चीना फाटल्यान भारताक दुसरी सुवात फावो जाली. 2006च्या दोहा एशियाडांत भारतान नेमबाजींत 3 भांगराची, 5 रुप्यांची आनी 6 कांस्या पदका मेळयल्लीं. हे फावट 9 भांगराचीं आनी 6 कांस्या पदका जिखल्यांत.
एथलेटिक्सांत चड पदकां
अंदूच्या एशियाडांत एथलेटिक्सांत भारताक सगल्यांत चड पदकां मेळ्ळ्यांत. एथलिटांनी 6 भांगराची, 14 रुप्यांची आनी 9 कांस्या पदकां मेळयलीं. तिरंदाजींत भारताक 5 भांगराची, 2 रुप्यांची आनी 2 कांस्या पदका फावो जाली. भारतान 27 टक्के पदकां एथलेटिक्स, 21 क्के शूटिंगात आनी 8 टक्के तिरंदाजींत मेळयलीं. हाचो अर्थ भारताक 56 टक्के पदकां ह्या तीन खेळ प्रकारांत मेळ्ळी. तातूंत वट्ट 18 भांगराची पदका मेळ्ळी. भारताच्या वट्ट भांगरा पदकांत व्हो वांटो 64 टक्के आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
