भांगरभूंय | प्रतिनिधी
खबरां संस्था
चेन्नयः 3 बाद 2 अशे कठीण परिस्थितींतल्यान पंगडाक भायर काडून वन-डे वर्ल्ड कपाच्या पयल्या मॅचींत भारताक 6 विकेटींनी जैत मेळोवन दिवपाचो म्हा पराक्रम किंग कोहली आनी केएल राहूल हांणी केलो. कॅप्टन रोहित शर्मा. ईशान किशन आनी श्रेयस अय्यर हे शून्यार बाद जाल्या उपरांत अवसान गळयनास्तना कोहली आनी राहुलान आपल्या बॅटीचें उदक ऑस्ट्रेलियेक दाखोवन दिलें आनी एकोडी झूंज दिवंन भारताक हारीच्या दारांतल्यान ओडून हाडून जैताचो उजवाड दाखयलो.
भारताची कोहली- राहुल ही जैतिवंत जोडी फोडपा खातीर कॅप्टन पॅट कमिन्सान आपले सयत ग्लेन मॅक्सवेल, कॅमरून ग्रीन आनी अडम झम्पा ह्या बोलराक आलटून पालटून वापरलें. मात कोहली- राहुल जोडये सामकार तांचें कांय चल्लें ना. 34-5 ओव्हरीत ताणी पंगडाचो देड शेंकडो पुराय केलो. ह्या वेळार कोहली 79 आनी राहुल 64 धांवड्यांचेर खेळटाले. पंगडाच्यो 167 धांवड्यो जाल्लो तेन्ना हेजलवुडान लाबुशेना वरवीं कोहलीक कॅच आवट केलो. ताणे 116 बॉलांत 6 चौक्यांनी 86 धांवड्यो केल्यो. उपरांत हार्दिक पंड्या वांगडा राहुलान सके हुबोवन भारताच्या जैताचे सोपस्कार पुराय केले. ऑस्ट्रेलियेच्या 199 धांवड्यांक भारतान 41.2 ओव्हरींत 4 बाद 201 अशी जाप दिली. राहुलान 115 बॉलांत 8 चौके आनी 2 सक्यांनी नाबाद 97 जाल्यार हार्दिकान 6 बॉलांत एक सक्यान नाबाद 11 धांवड्यो केल्यो.
ऑस्ट्रेलियेन दिल्ल्या 200 धांवड्यांच्या आव्हानाचो फाटलाव करतना भारताक हेजलवूड आनी मिचेल स्टार्कान एका फाटल्यान एक तीन धपको दिवंन भारताची स्थिती 3 बाद 2 धांवड्यो अशी करून वडयली. ऑस्ट्रेलियेक 199 धांवड्यांत आवट केल्ल्यान भारत ही मॅच सुशेगादीन जिखतलो अशें सुरवेक दिसतालें. मात जे जालें तें मात सामकें विपरीत. शुभमन गिलाक डेंग्यू जाल्ल्यान ताचे सुवातेर भारताच्या डावाची सुरवाक करपाक आयिल्ल्यान ईशान किशनाक (0) स्टार्कान कॅमरून ग्रीनाक कॅच दिवपाक फोर्सार केलें. 6 बॉल खेळून खातें उगडपाचे तयारेंत आशिल्ल्या कॅप्टन रोहित शर्माक हेजलवुडान बोल्ड केलें. चवथ्या नंबराचेर खेळपाक आयिल्ल्या श्रेयस अय्यराक (0) हेजलवुाच्या बॉलार डेव्हीड वॉर्नरान कॅच घेवंन भारताची स्थिती 3 आवट 2 अशी केली. डावाचे सुरवेक आघाडेंतले तीन खेळगडे शून्याचेर आवट जाल्ल्याचें चॅपोक स्टेडियमार दिसलें. विराट कोहली आनी केएल राहुलान सादूरपणान खेळून आपल्यो विकेटी सामाळून डाव साल्वार केलो. तांणी भारताच्या हातांतल्यान निसटल्ली ही मॅच परत जाग्यार हाडली आनी पंगडाच्या जैताची आस्त वाडयली.
कोहली- राहुल जोडयेन दोन धांवड्यांत तीन विकेटी पडल्या उपरांत डाव साल्वार करून 25.4 ओव्हरींत पंगडाचो शेंकडो पुराय केलो. ह्या दोगांय मदीं अर्द शेंकडो पयलीं पुराय करपाची सर्त लागल्ली. कोहलीन ती जिखली. ताणे 75 बॉलांत 3 चौक्यांनी 50 धांवड्यो केल्यो तशेंच भागिदारीचो शेंकडो पुराय केलो. उपरांत राहुलान 73 बॉलांत 5 चौक्यांनी आपलो अर्द शेंकडो पुराय केलो. हे जोडयेन पंगडाच्यो 125 धांवड्यो पुराय केल्यो तेन्ना मॅच पुरायपणान भारताच्या दाल्यांत आयिल्ली.
ऑस्ट्रेलियेच्यो 199 धांवड्यो
चेन्नयच्या चेपॉक स्टेडियमाचेर ऑस्ट्रेलियेचो कॅप्टन पेट कुमिन्सान टॉस जिखून पयलीं बॅटींग करपाचो निर्णय घेतलो आनी
49.3 ओव्हरींत तांचो डाव 199 धांवड्यां सोपलो. स्टीव स्मिथान 46 आनी डेवीड वॉर्नरान 41 धांवड्यो केल्यो. रवींद्र जडेजा, कुलदीप यादव आनी रविचंद्रन आश्विनान मेळून 6 ऑस्ट्रेलियन बॅट्समनांक पॅव्हेलियनांत धाडले. जडेजान तीन विकेटी घेतल्यो. कुलदीप यादव आन जसप्रीत बुमराहक दरेकी दोन विकेटी मेळ्ळ्यो. आश्विन आनी महम्मद सिराजान दरेकी एक विकेट घेतली.
ऑस्ट्रेलियेचो ओपनर डेवीड वॉर्नर वन-डे वर्ल्ड कपांत सगळ्यांत फास्ट 1000 धांवड्यो करपी खेळगडो थारलो. ताणे 19 डावांत व्हो विक्रम आपल्या नांवार केलो. हाचे पयलीं व्हो विक्रम सचीन तेंडुलकार एबी डिविलियर्स (20 डाव) हांच्या नांवार आशिल्लो. 5 धांवड्यांचेर मिचेल मार्शाची विकेट पडल्या उपरांत वॉर्नर आनी स्मिथान ऑस्ट्रेलियेचो डाव साल्वार केलो. तांणी दुसरे विकेटी खातीर 85 बॉलांत 69 धांवड्यांची भागिदारी केली. ही जोडी कुलदीप यादवा वॉर्नराक आवट करून फोडली
कोहलीच्यो 15 कॅची
वर्ल्ड कपांत सगल्यांत चड कॅची घेवपी विराट कोहली पयलो भारतीय खेळगडो थारलो. ताच्या नांवार आतां वट्ट 15 कॅची जाल्यात. कोहलीन अनिल कुंबळेचो 14 कॅचींचो विक्रम तोडलो. ऑस्ट्रेलियेच्या डावाची सुरवात स्लो जाली. पयल्या 10 ओव्हरींत तांणी एक विकेट वोगडावन फकत 43 धांवड्यो केल्यो. बुमराहान मिचेल मार्शाक स्लिपांत विराट कोहलीच्या हस्तुकीं कॅच आवट केलें आनी विराटाचो विक्रम जालो.
तिसरे ओव्हरीच्या दुसऱ्या बॉलाचेर बुमराहान मिचेल मार्शाक (0) कॅच आवट केलें. तागेल्या बॅटीक लागून बॉल स्लिपांत गेलो आनी कोहलीन उत्कृश्ट कॅच घेतली. 17वे ओव्हरींत कुलदीप यादवान वॉर्नराची आपल्या बॉलाचेर कॅच घेतली. वॉर्नर फूल लेंथ बॉलाचेर ड्रायव्ह मारपाक गेलो आनी बॉल कुलदीपाच्या हातांत गेलो. 28वे ओव्हरींत स्टीव स्मिथाक (46) रवींद्र जडेजान बोल्ड केलें. 30वे ओव्हरींत मार्नस लाबुशेन (27) जडेजाच्या बॉलार राहुलाच्या हातांत कॅच दिवंन आवट जालो. अलेक्स कॅरी (0) ग्लेन मॅक्सवेल (15), कॅमरून ग्रीन (8) , पॅट कमिंस (15) सवाय भितर आवट जाले. स्टार्कान (28) मात्सो प्रतिकार केलो. निमाणे 49. 3 ओव्हरींत ऑस्ट्रेलियेचो डाव 199 धांवड्यांत सोपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
