भांगरभूंय | प्रतिनिधी
प्रवासी रेल्वे तिकीट घेवपाक पणजें भेट दितात तेन्ना लागसारच्या बाजारपेठे, रेस्टॉरंट आनी आकर्शणांचो सोद घेवपाची शक्यताय आसा. हाका लागून थळाव्या वेवसायांक चालना मेळूंक शकता आनी रोजगाराची संद निर्माण जावंक शकता.
गजाल अशी, म्हजो एक इश्ट आपले फामिली बराबर श्रीरंगपट्टणम वचपाचो प्लान करतालो, जाल्यार म्हाका ताणें रिक्वेस्ट केली, म्हूण ताका तिकेटी काडपाक हांव पणजे पाट्यार पोरण्यां कावंटरार गेल्लों… जाल्यार थंय नोटिस मारिल्ली – काउंटर शिफ्टेड टू पणजी पोस्ट ऑफिस. तशीच स्कुटर स्टार्ट मारली आनी पोस्टान आयलों. विचारपूस आनी बुकिंग जाले उपरांत भायर सरलों. थळाव्या लोकांक आनी पर्यटकांक सुविधेचें उतर दिवपी म्हत्वाचे घडणुकेंत कोंकण रेल्वे कॉर्पोरेशन लिमिटेड (केआरसीएल) कंपनीन गोंयच्या इतिहासीक पणजेच्या पोस्ट ऑफिसा भितर तिकेट काउंटर स्थापन केला.
पंजीम, पणजें, पणजी ह्या नांवानय वळखतात, ती ही गोंयची राजधानी. तिचें इतिहासीक आनी संस्कृतीक म्हत्व अफाट आसा. वसाहत काळांतल्या वास्तुकलेचो, सुरम्य भोंवडेचीं सुवाती आनी भारतीय आनी पुर्तुगेज प्रभावाचो एक आगळोच मेळ ह्या शारान सजयल्लो आसा. ह्या मोगाळ शाराच्या काळजांत पणजी पोस्ट ऑफिस उबें आसा, ही वसाहतकाळांतली इमारत जी दशकां सावन शाराच्या दृश्टीकोनाचो एक अभिन्न भाग जावन आसा. हे इतिहासीक रचणुके भितर कोंकण रेल्वे तिकीट काउंटर दवरपाचो निर्णय आधुनिकतेक आलिंगन दितना गोंयचें दायज सांबाळपाचो विचार जाता. पोरण्या आनी नव्याचें हें संलयन पोस्ट ऑफिसाचें सौंदर्यशास्त्र वाडयताच, पूण प्रवाशांक रेल्वे सेवा मेळोवपाक एक कार्यक्षम मार्गय दिता.
सिनीयर सिटिझन पोस्टान येता तेन्ना हाॅलिडे प्लान करपाक शकता. कोणूय रेल्वे तिकेट बूक करपाक येता तेन्ना पोस्ट बचत येवजण जाणून घेवपाक शकता आनी नोंद करपाक शकता. पणजे कोंकण रेल्वेची तिकेट काउंटर स्थापन जाल्ल्यान आतां प्रवाशांक शारा भितरच सोयीस्कर रितीन तिकेट बुक करपाक मेळटा.
पर्यटन हो गोंयचे अर्थवेवस्थेचो प्राण. तो राज्याच्या येणावळीक व्हड योगदान दिता. राज्या भितर प्रवासाची सुगमताय आनी सुविधा हांचो पर्यटकांक आकर्शीत करपाक म्हत्वाचो वांटो आसता. पणजें समर्पीत तिकीट कावंटर दिवन कोंकण रेल्वे सुगम प्रवासाची सुवीधा दिता आसतना पर्यटकांक गोंयच्या विंगड विंगड वाठारांनी भोंवपाक प्रोत्साहन दिता. ते भायर ह्या नव्या तिकीट काउंटराक लागून वाडिल्ल्या पांयतणांचो थळाव्या अर्थवेवस्थेचेर सकारात्मक परिणाम जावंक शकता. प्रवासी रेल्वे तिकीट घेवपाक पणजें भेट दितात तेन्ना लागसारच्या बाजारपेठे, रेस्टॉरंट आनी आकर्शणांचो सोद घेवपाची शक्यताय आसा. हाका लागून थळाव्या वेवसायांक चालना मेळूंक शकता आनी रोजगाराची संद निर्माण जावंक शकता, जाका लागून पणजें लोकांक फायदो जातलो. प्रादेशिक पर्यटनाक चालना दिवपाकय ही सुदारीत जोडणी म्हत्वाची भुमिका करूंक शकता. प्रवाशांनी आतां कोंकण रेल्वे वरवीं सहजतायेन मेळपी रत्नागिरी, गणपतीपुले, कारवार ह्या प्रतिकात्मक थळांचेर भोंवपाची येवजण करूं येता. हाका लागून कोंकणाच्या सुरम्य दर्यादेगेर विंगड विंगड अणभव सोदपी प्रवाशांचेर शक्यतायेचो संवसार उक्तो जाता.
पोस्ट ऑफिसात कोंकण रेल्वे तिकेट काउंटराची थापणूक हो गोंयांतल्या प्रवास सेवांच्या विकासाचो म्हत्वाचो मार्गदर्शक फातर. इतिहासीक संरक्षण आनी आधुनिकीकरण हांच्या सुसंवादात्मक मिश्रणाचें प्रतीक आसून, पर्यटक आनी थळाव्या लोकांक रेल्वे प्रवास चड सुलभ आनी सोयीचो जाता. ही उदरगत रेल्वे तिकीट बुक करपाची प्रक्रिया सोपी करताच वांगडा पर्यटनाक चालना दिवपाची, थळाव्या अर्थवेवस्थेक चालना दिवपाची आनी टिकावू प्रवास पद्दतींक चालना दिवपाचीय तांक दाखयता. ताका लागून ह्या वाठारांतली जोडणी वाडटा. गोंय एक मुखेल पर्यटन थळ म्हणून उदरगत चालू आशिल्ल्यान राज्याची सोबीतकाय आनी सांस्कृतीक दायजाचो आनंद सगळ्यांक मेळचो हे खातीर पणजें पोस्ट ऑफिसात कोंकण रेल्वेच्या तिकेट काउंटरा सारकिल्या मुळाव्या साधनसुविधां मदीं गुंतवणूक करप गरजेचें आसा.
मनोज मंगेश कुंकळकार
9764215365
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
