भांगरभूंय | प्रतिनिधी
“आगो, हळू- हळू. ताळो भाजून घेवंक जाय तुका? मातशी तरी न्हिवंदी ती कॉफी!”
“निशा तुका खबर आसा न्ही, गरम-गरम कॉफी पिली की म्हजी तकली थंड जाता ती? विशाखान दोळे मोट्टे करून निशा कडेन पळयलें.
“आतां सांगता तूं म्हाका कितें जालां तें तुमच्या मदीं?”
“कितें जालां? ताचें चडूच जालां. असलो कसलो घोव हो? दिसभर आॉफिसांत काम करून थकून घरा येतां हांव. सदच्या भशेन हांव काल घरा गेलें. चिंतलें मातशें विसव घेवन घरांतल्या कामांक हात घालतलें म्हूण. फॅनाचो बटण चालू केलो आनी खाटीर आडवें पडलें. कितलो वगत जालो फॅनाचे वारें लागच ना. तकली वयर काडून पळयल्यार फॅनूच ना! कुडींतली ए.सी कुच्छित्री नदरेन म्हाका पळयता शी दिसूंक लागली. ताका खबर आसा म्हाका ए.सी. ची थंडाय पचना म्हूण. मुद्दाम केला ताणें हें. चाये खातीरच्या मोगा पासत तो इतलो पिसो जाल्यार चायेकूच करपाची बायल. म्हाका कित्याक केली?” विशाखा तणतणलें.
काणी आयकून निशान तकलेर हात मारलो.
हे वाटेन विशालान मिलिंदा बराबर च्यायेच्या गाड्यार वचून च्याचे चार पेले सोंपयले.
“कितें इश्टा, इतली च्या पियेवन कसलें जैत मनयता?” मिलिंदान विशालाक विचारलें.
“च्याचें!”
“तें आनी कशें?”
“आरे तीन दीस जाले विशाखा कॉफी करून थेयता. पयल्या दिसा हांवें मुकाट्यान पिली. दुसर्या दिसाय कॉफीच! वेगळी च्या करून पितलो म्हणल्यार दूद सुद्धा दवरूंक ना. तिसर्या दिसाय तेंच! म्हाका मारली भिरभिरी. हाका सारकीच बुद्ध शिकयली. ए.सी. आसून लेगीत म्हाका फॅनाचे वारें खावचें पडटा. हांवें सोमतो फॅनूच काडलो. हाका झेमे खातीर तळमळटा तें पळोवन उट्टें काडटलो म्हूण आसलो पूण पळयत जाल्यार हें धावलें कुळारा. येवंदी जाय तेन्ना. तो मेरेन हांव आसां आनी म्हजी च्या!”
मिलिंद तटास जावन आयकतूच उरलो.
‘आपूण ताका बुद्द शिकयता’ हें चिंतून दोगांय मुमुरख्यांनी हांसपाक लागली. कांय दीस हें चल्लें पूण मागीर मात एकामेकांचे यादीन साकर घालून सुद्धा कॉफी कोडू आनी च्या पचकी लागूंक लागली. विशाखा तरीय बदलें ना. शेवटाक विशालाकूच नमतें घेवचें पडलें. विशालाचे शंबर फोन, हजार मॅसेजी चुकयल्या उपरांत गेर्र सोडोवपाक विशाखा ताका मेळपाक राजी जालें. लग्ना पयलीं ज्या हॉटेलांत तीं मेळटालीं त्या हॉटेलांत दोगांयनी मेळपाचें थारायलें.
थारल्या प्रमाण विशाखा हॉटेलांत पावलें. विशालाक पळोवन तें तांकां फाट करून उबें रावलें.
“आजुनूय राग आसा?” कितें तरी उलोवपाक जाय म्हूण तो उलयलो.
“राग? म्हाका वाज आयला ह्या झगड्यांचो. च्या की कॉफी, ए.सी की फॅन, शिवराक की नुस्तें, ह्या गजालींचेर बाचाबाची करून म्हाका बेजार आयला. अशें जर चलत रावलें जाल्यार आमी दोगांय वांगडा टिकची नात. एकामेकांच्यो आवडी लक्षांत घेवन, एकामेकांक मान दिवन, समजिकायेन वागपातूंच शाणेपण आसा. जमतलें तुजे कडेन हें? विशाखान म्हणलें.
“हय जमतलें. देखुनूच हांवें आमच्या दोगांय खातीर कॉफी मागयल्या.” विशाल.
हें आयकून विशाखाचो राग न्हिवलो आनी तें येवन खुर्चेर बसलें. ताणें च्या मागयलो आनी मोगाळ हांसो दिवन म्हणलें, “पिशा, एकामेकांच्यो आवडी लक्षांत घेवया म्हणल्या हांवें. तूं तुजी च्या पी आनी हांव म्हजी कॉफी पितां.”
निमिशा हरी होबळे
8329532163
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
