भांगरभूंय | प्रतिनिधी
संवसारीक वन डे क्रिकेट सर्तींत बांगलादेशान आपले पयले मॅचींत अफगाणिस्ताना आड जबरदस्त प्रदर्शन केलें. मेहिदी हसन मिराझ हाणें अश्टतासांचें प्रदर्शन करतना बांगलादेशाक 6 विकेटींनी सोंपें जैत मेळोवन दिवपाक हातभार लायलो.
बांगलादेशान टॉस जिखून अफगाणिस्तानाक पयलीं बॅटींग करपाचें आमंत्रण दिलें. रहमनुल्लाह गुरबाज (47) आनी इब्राहीम झाद्रान (22) हाणें सुरवात बरी करून दिली. पूण, शाकिर अल हसन (3-30) आनी मेहिदी हसन मिराझ (3-25) ह्या स्पिनरांनी मॅच घुंवडायली. आझमतुल्लाह ओमारझाई (22), मुखेली हशमतुल्लाह शाहिदी (18), रहमत शाह (18) हांणी लेगीत हातभार लायलो. शोरिफुल इस्लामान 2 विकेटी घेतल्यो. अफगाणिस्तान 1 बाद 83 असो घटमूट स्थितींत आशिल्लो. पूण, उपरांत 37.2 ओव्हरींनी 156 धांवड्यांचेर डाव सोंपलो.
बांगलादेशाचो ओपनर तानझीद हसन (5) धांवबाद जालो. आनी लिटन दास (15) लेगीत अपेसी थारलो. ताका लागून धांवड्यांचो फाटलाव करपी बांगलादेशाची अवस्था 2 बाद 27 अशी जाल्ली. मेहिदी हसन मिराझ आनी नजमूल होसैन शांतो हाणें अफगाणिस्तान बॉलींग फोडून काडपाक सुरवात केली. तीन विकेटी घेवपी मिराझान अर्द शेंकड्याची खेळी केली आनी शांतो वांगडा तिसरे विकेटी खातीर शेंकड्याची भागिदारी केली. मिराझ 73 बॉलांनी 5 चवक्यां सयत 57 धांवड्यो करून बाद जालो.
ते उपरांत शाकिबान रोखडीच मॅच सोंपोवपाचो यत्न केलो. पूण, तो 14 धांवड्यांचेर कॅच बाद जालो. शांतो 83 बॉलांनी तीन चवके आनी एका सक्याचे मजतीन नाबाद 59 धांवड्यो केल्यो. बांगलादेशान 34.4 ओव्हरींनी 4 विकेटी वगडावन 158 धांवड्यो करून मॅच 6 विकेटींनी जिखली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
