दक्षीण आफ्रिकेचें झणझणीत जैत

भांगरभूंय | प्रतिनिधी

संवसारीक वन डे क्रिकेट सर्तींत दक्षीण आफ्रिकेन काल नवी दिल्लीचो अरुण जेटली स्टेडियम गाजयलो. संवसारीक वन डे क्रिकेट सर्तींतली सर्वोच्च धांवसंख्या. संवसारीक सर्तींतलो जलद शेंकडो आनी संवसारीक सर्तींतल्या एका डावांत तीन शेंकडे अशे साबार विक्रम दक्षीण आफ्रिकेन आपल्या नांवाचेर करतना श्रीलंका पंगडा आड 102 धांवड्यांनी जैत जोडलें.

429 धांवड्यांची मोख दोळ्या मुखार आसतना श्रीलंकाचो पंगड सहज दिमी मारतलो अशें दिसतालें. पूण, ताणें लेगीत खर संघर्श केलो. हे मॅचींत दोनूय पंगडांनी मेळून 720 परस चड धांवड्यो केल्यो आनी संवसारीक सर्तीच्या इतिहासांतली ही सर्वोच्च धांवसंख्या थारली. 2019त ऑस्ट्रेलिया आनी बांगलादेश ह्या पंगडां मदीं जाल्ले मॅचींत 714 धांवड्यो जाल्ल्यो.

बॅट्समनांक मजत करपी खेळपट्टीचेर श्रीलंका पंगड बरी सुरवात करतलो अशी आस्त आशिल्ली. पूण, पथुम निसंका (0) हो मार्को यानसेनाच्या बॉलाचेर एलबीडब्ल्यू बाद जालो. कुशल मॅण्डिसान पांचवे ओव्हरींत तीन सको मारून श्रीलंकेच्या चाहत्यांक खूश केले. ताणें 25 बॉलांनी अर्द शेंकडो नोंदयतना तीन चवके आनी स सके मारले. संवसारीक सर्तींत श्रीलंकेच्या बॅट्समनान नोंदयिल्लो हो तिसरो जलद अर्द शेंकडो थारलो. मार्कोन उत्कृश्ट उत्कृश्ट बॉलाचेर परेराक (7) बोल्ड केलो.

मॅण्डिसाक तिसरे विकेटी खातीर सदीरा समरविक्रमाची बरी साथ मेळ्ळी. दोगांयनी 28 बॉलांनी 42 धांवड्यो केल्यो. रबाडान म्हत्वाची विकेट घेतली. मॅण्डिस 42 बॉलांनी चार चवके आनी आठ सक्यांचे मजतीन 76 धांवड्यो करून स्टम्प बाद जावन तंबूंत परतलो. ताच्या फाटोफाट गेराल्ड कोएत्झीन स्लॉ बॉलाचेर श्रीलंकेच्या समरविक्रमाक (23) चकयलो आनी तो कॅच दिवन तंबूंत परतलो.

हे विकेटी उपरांत श्रीलंकेची धांवगती मात्शी स्लो जाली आनी आफ्रिकेन स्पिनरांक कामांक लायले. धनंजय डीसिल्वा (11) केशव महाराजाच्या बॉलाचेर कॅच बाद जालो आनी श्रीलंकेचो अर्दो पंगड 150चेर तंबूंत परतून गेलो. चरिथ असलंकान 46 बॉलांनी अर्द शेंकडो पुर्ण केलो. श्रीलंका मोखीच्या लागसार पावपाक शकतालो अशें दिसतालें. पूण, एनगिडीन चरिथाक (79) बाद करून श्रीलंकेची आस्त सोंपयली. ते उपरांत श्रीलंकेच्यो विकेटी थारावीक अंतरान पडत गेल्यो आनी अखेरेक 102 धांवड्यांनी हार घेवची पडली.