भांगरभूंय | प्रतिनिधी
भारताच्या बायलांच्या हॉकी पंगडान जपानाक 2-1 फरकान हारोवन आशियायी खेळांतलें कांश्या पदक जिखलें. भारतान सिओल 1986, दोहा 2006 आनी इंचियोन 2014 उपरांत आशियायी खेळांत भारताच्या बायलांनी हॉकींत मेळयिल्लें हें चवथें कांश्या पदक आसा. एकोडें भांगरा पदक 1982त नवी दिल्ली जाल्ले आशियायी खेळांत जिखिल्लें. जाल्यार 2018त जकार्तांत जाल्ले सर्तींत रुप्या पदक जोडिल्लें.
भारता वतीन दीपिकान 5व्या मिनटाक आनी सुशीला चानून 50व्या मिनटाक गोल केलो. जपाना वतीन एकोडो गोल युरी नागाईन 30व्या मिनटाक केलो. भारतान मॅचीक आक्रमक सुरवात केली. ताचो फायदो ताका रोखडोच जालो. भारताक पांचव्या मिनटाक पॅनल्टी स्ट्रोक मेळ्ळो. दीपिकान गोल करून भारताक 1-0 असो मुखार व्हेलो. पूण, मध्यांतर जावपाक कांय मिनटां बाकी आसतना जपानान बरोबरी सादली. युरीन पॅनल्टी कॉर्नराचेर गोल करून जपानाक 1-1 असो बरोबरींत हाडलो.
मॅचींत बरोबरी सादल्या उपरांत जपानाचो आत्मविस्वास वाडलो. ताणें दुसऱ्या अर्दांत आक्रमक रितीन खेळ केलो. ताणें आघाडी घेवपाचो खूब यत्न केलो. भारतान लेगीत सेगीत यत्न केले. पूण, दोनूय पंगडांक तिसऱ्या क्वॉर्टरांत गोल करपाक जमलो ना. चवथ्या आनी निमाण्या क्वॉर्टरांत दोनूय पंगडांनी गोल करपाचो खूब यत्न केलो. पूण, येस भारताक फावो जालें. 50व्या मिनटाक सुशीलान पॅनल्टी कॉर्नराचेर हो गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
