भांगरभूंय | प्रतिनिधी
हांगझोउ (चीन), खबरां संस्था : आशियायी खेळां सर्तीच्या तेराव्या दिसा भारतान पदकांचो शेंकडो मेळयलां. हे सर्तींत भारतीय खेळगड्यांक शंबर पदकां मेळयल्यांत. बायलां कबड्डी खेळगड्यांनी भारताक शंबरावें पदक जिखून दिलें.
आशियायी खेळां सर्त 2023 वर्सा भारतीय खेळगड्यांनी बरी कामगिरी केली. हातूंत तेरावो दीस म्हळ्यार ६ ऑक्टोबर भारता खातीर भांगराचो दीस थारलो. ह्या दिसा भारताक भांगरा पदका सयत वट्ट ९ पदकां मेळ्ळीं. हॉकी पंगडान फायनलींत जपानाक 5- 1 असो पराभव करून भांगरा पदक मेळयलें. दादल्यांच्या भारतीय क्रिकेट पंगडा सयत हेर खेळांत भारतान ९ पदकां मेळयल्यात. तेराव्या दिसा निमाणे मेरेन भारताची पदकांची संख्या 95 मेरेन पावली. पूण आतां भारतान शंबर पदकां मेळोवन पदकांचो शेंकडो पार केलां.
भारतीय बायलां कबडी खेळगड्यांनी काल चीन तैपे पंगडाक हारोवन भांगरा पदक जिखलें. हातूंत पुण्यांतल्या स्नेहल शिंदेची कामगिरी उत्कृश्ट आशिल्ली. नागपूरच्या ओजस देवताळे हाणें धनुर्विद्येंत भांगरा पदक मेळयलें. ऋतुजा भोसलेन रोहन बोपन्ना वांगडा मिक्स डबल्स टेनिसांत भांगरा पदक जिखलें. अविनाश सेबलान स्टीपलचेसांत भांगरा पदक जिखलें.
भारतान हे सर्तींत इतिहास घडयलो. भारतान 25 भांगरा पदकां सयत 100 पदकां जिखल्यांत. मजगतीं, खेळां सर्त 23 सप्टेंबराक सुरू जाल्ली आनी फाल्यां (8 तारखेक) ती सोंपतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
