भांगरभूंय | प्रतिनिधी
पाकिस्तानान संवसारीक वन डे क्रिकेट सर्तीचे मोहिमेची सुरवात जैतान केली. आपले पयले मॅचींत ताणें नॅदरलॅण्डाक 81 धांवड्यांनी हारयलो. पाकिस्तानान पयलीं बॅटींग करतना 49 ओव्हरींनी सगल्यो विकेटी वगडावन 286 धांवड्यो केल्यो. ते उपरांत नॅदरलॅण्डाचो डाव 41 ओव्हरींनी 205चेर सोंपयलो.
टॉस हारल्या उपरांत पयलीं बॅटींग करपी पाकिस्तानाची सुरवात बरी जाली ना. ताचे तीन बॅट्समन सवाय भितर बाद जाले. मोहम्मद रिझवान आनी सौद शकील हांणी अर्द शेंकड्यांची खेळी करून पंगडाक संकश्टांतल्यान भायर काडलो.
धांवड्यांचो फाटलाव करपी नॅदरलॅण्डाची लेगीत सुरवात बाबत जाली. मॅक्स ओ’डोड (5) आनी कॉलीन आर्कमन (17) हे वळेरेन हसन अली आनी इफ्तिखार अहमद हांचे शिकार थारले. विक्रमजीत सिंग आनी बॅस डी लीड हाणें डाव सांबाळ्ळो. दोगांयनी 70 धांवड्यांची भागिदारी करून पाकिस्तानाक घाम काडलो. अखेरेक शादाब खानान ही जोडी फोडली. विक्रमजीत 67 धांवड्यो करून बाद जालो. ताचे उपरांत डी लीडान अर्द शेंकडो मारून नॅदलॅण्डाची आस्त जिवी दवरली.
नॅदरलॅण्डाक निमाण्या 20 ओव्हरींनी 137 धांवड्यांची गरज आशिल्ली आनी ताच्या हातांत 5 विकेटी आशिल्ल्यो. ताका लागून मॅचींत उमळशीक वाडिल्ली. पूण, अणभवी पाकिस्तानान नॅदरलॅण्डाक जैता पसून आडायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
