भांगरभूंय | प्रतिनिधी
मुखेली हरमनप्रीत सिंगाच्या दोन गोला नेटार भारताच्या दादल्यांच्या हॉकी पंगडान सध्याचो वस्ताद जापान पंगडाक एक वटेन जाल्ले फायनलींत 5-1 अशा फरकान हारोवन आशियायी खेळांत भांगरा पदक जिखलें. तशेंच फुडल्या वर्सा जावपी पॅरीस ऑलिम्पिका खातीर थेट पात्रताय लेगीत मेळयली.
टोकियो ऑलिम्पिकांत कांश्या पदक जिखपी भारतान णव वर्सांनी आशियायी खेळांत भांगरा पदक जिखलें. भारता वतीन हरमनप्रीत सिंगान (32वें मिनट आनी 59वें मिनट), अभिषेकान (48वें मिनट), अमीत रोहिदास (36वें मिनट) आनी मनप्रीत सिंग (25वें मिनट) हाणें गोल केलो. जापाना वतीन एकोडो गोल एस तनाकान 51व्या मिनटाक केलो.
पयल्या क्वॉर्टरांत दोनूय पंगडांनी बचावात्मक खेळ केलो. भारताक 15व्या मिनटाक पॅनल्टी कॉर्नर मेळ्ळो. पूण, अमीत रोहिदासाची फ्लीक थेट जापानाच्या गोलकीपरा कडेन गेली. दुसऱ्या क्वॉर्टरांत भारतान सेगीत हल्ले केले. हाचो फायदो ताका तिसऱ्या मिनटाक पॅनल्टी कॉर्नराच्या रुपान मेळ्ळो. पूण, हे खेपे लेगीत रोहिदासाचो नेम चुकलो. अखेरेक भारताचें खातें 25व्या मिनटाक मनप्रीतान उगडलें. ललित उपाध्याय सर्कलाचे भितर बॉल घेवन पावलो आनी ताणें निलाकांताक बॉल दिलो. ताणें सर्कला भितर उबो आशिल्ल्या मनप्रीताक बॉल दिलो. मनप्रीतान कसलीच चूक करिनासतना बॉल गोलपोस्टांत घालो.
तिसऱ्या क्वॉर्टरांत भारतान पॅनल्टी कॉर्नराचे दोन गोल केले. हरमनप्रीतान 32व्या मिनटाक पंगडाचो दुसरो गोल केलो, जाल्यार चार मिनटांनी रोहिदासान गोल केलो. चवथ्या क्वॉर्टरांत अभिषेकान तिसऱ्या मिनटाक आनी हुटर वाजपाक एक मिनट बाकी आसतना हरमनप्रीतान गोल करून भारताक उत्कृश्ट जैत मेळोवन दिलें.
मजगतीं, काल भारतान हॉकींत मेळयिल्ल्या भांगरा पदकां सयत 2 रुप्या पदकां आनी 6 कांश्या पदकां जिखलीं. अशे तरेन भारताच्या वट्ट पदकांचीं संख्या 95 जाल्या.
कुस्ती, तिरंदाजी आनी ब्रिजांत पदकां
कुस्तींत भारतान तीन पदकां जिखलीं. बायलांच्या 62 कील वजन गटांत, 76 कील वजनाच्या फ्री स्टायल प्रकारांत आनी दादल्यांच्या 57 कील वजनाच्या फ्री स्टायल प्रकारांत पदक जिखलें. किरणान मंगोलियाची गॅनबॅट अरिउंजरगल हिका हारोवन कांशें जिखलें. जाल्यार अमनान दादल्यांच्या फ्री स्टायलींत कांशें आनी सोनम मलिक हिणें चीनाचे जिया लॉन्ग हिका हारोवन तिसरी सुवात मेळयली.
ब्रिज आनी तिरंदाजींत एकेक रुप्या पदक आयलें. ब्रिजाचे फायनलींत हारिल्ल्यान ताका रुप्या पदकाचेर समाधान मानचें पडलें. जाल्यार दादल्यांच्या तिरंदाजी पंगडान रिकर्व्ह सांघीक प्रकाराचे फायनलींत दक्षीण कोरिया आड हार घेवची पडली. ताका लागून ताका रुप्या पदकाचेर समाधान मानचें पडलें. बायलांच्या तिरंदाजी पंगडाक कांश्या पदक फावो जालें. बॅडमिंटनांत एच एस प्रणयाक कांश्या पदकाचेर समाधान मानचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
