भांगरभूंय | प्रतिनिधी
प्रधानमंत्र्यां हस्तुकी 26 ऑक्टोबराक उक्तावण
पणजी, प्रतिनिधी : गोंयांत 26 ऑक्टोबर ते 9 नोव्हेंबर ह्या काळांत जावपी 37 वे राष्ट्रीय खेळा सर्तीत वांटो घेवपी अॅथलेटां मदीं 49 टक्के बायलां अॅथलेट आसतलीं. हाचे पयलीं केन्नाच बायलां अॅथलेट इतल्या व्हड प्रमाणांत वांटेकार जावंक नात. खेळां सर्तीत वट्ट 10,860 अॅथलेट वांटेकार जातले, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री सावंत हांणी आयज दनपरा पत्रकार परिशदेंत राष्ट्रीय खेळां सर्तीची म्हायती दिली. ह्या वेळार खेळा मंत्री गोविंद गावडे आनी हेर अधिकारी हाजीर आशिल्ले.
बिरेस्तारा 26 ऑक्टोबराक सांजे 6.30 वरांचेर प्रधानमंत्री नरेंद्र मोदी हांचे हस्तुकीं फातोड्डें स्टेडियमाचेर सर्तीचें उक्तावण जातलें. उक्तावणाक 12 हजार लोकांची उपस्थिती आसतली.
43 खेळां प्रकारांत ही सर्त जातली. पणजी, म्हापशें, वास्को, फोंडें, मडगांव, कोलवें दर्यादेग अश्या 28 जाग्यांचेर खेळ जातले. वट्ट 10,860 अॅथलेट वांटेकार जातले. तातूंतले 49 टक्के म्हणजे 5320 अॅथलेट हीं बायलां आसतलीं. सर्तीच्या आयोजना खातीर 4740 तांत्रिक अधिकारी आसतले. 43 खेळां प्रकारांतल्या 36 त गोंयचे अॅथलेट वांटो घेतले. सर्तीच्या 6 दीस पयली 20 ऑक्टोबर मेरेन सगळे स्टेडियम खेळपा खातीर सज्ज जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
