भांगरभूंय | प्रतिनिधी
डेव्हॉन कॉनवे आनी राचिन रवींद्र हांणी न्युझिलॅण्ड पंगडाक संवसारीक वन डे क्रिकेट सर्तीचे उक्तावणाचे मॅचींत 9 विकेटींनी सोंपें जैत मेळोवन दिलें.
ह्या जैता सयत न्युझिलॅण्डान 2019 संवसारीक सर्तीचे फायनलींत इंग्लंडा कडल्यान मेळिल्ले हारीचो बदलो लेगीत घेतलो. त्या वेळार लॉर्ड्स मैदानाचेर जाल्ली फायनल सुपर ओव्हरींत टाय जाल्या उपरांत इंग्लंड बावण्ड्री कावण्टाच्या आदाराचेर चॅम्पीयन जाल्लो.
भारतीय वंशाच्या राचिनान मेळिल्ले संदीचें भांगर करतना संवसारीक सर्तींत न्युझिलॅण्डा वतीन सगल्यांत जलद शेंकडो नोंदोवपाचो विक्रम केलो. कॉनवे अंदूंचे सर्तींत शेंकडो मारपी पयलो बॅट्समन थारलो. दोगांयनी नाबाद 273 धांवड्यांची भागिदारी करून न्युझिलॅण्डाक झणझणीत जैत मेळोवन दिलें.
कॉनवेन पयलेच ओव्हरींत दोन चवके मारून पंगडाक बरी सुरवात करून दिली. पूण, विल यंगान दुसरे ओव्हरीच्या पयल्याच बॉलाचेर विकेट वगडायली. सॅम कुरन हाणें ही विकेट घेतली. राचिनान दुसरे विकेटी खातीर कॉनवे वांगडा 200 परस चड धांवड्यांची भागिदारी करून विक्रम केलो. 1996त न्युझिलॅण्डाचो ओपनर नॅथन अॅस्टल हाणें संवसारीक सर्तींतले पदार्पणांत शेंकडो नोंदयिल्लो. संवसारीक सर्तींत जलद शेंकडो मारपाचो न्युझिलॅण्डाचो विक्रम कॉनवेच्या नांवार आशिल्लो. राचिनान ताका फाटीं घालो. राचिनान 82 बॉलांनी शेंकडो पुर्ण केलो. ताणें 96 बॉलांनी 11 चवके आनी पांच सक्यांचे मजतीन नाबाद 123 धांवड्यो केल्यो. कॉनवेन 121 बॉलांनी 19 चवके आनी तीन सक्यांचे मजतीन नाबाद 152 धांवड्यो केल्यो.
न्युझिलॅण्डान 36.2 ओव्हरींनी 1 विकेट वगडावन 283 धांवड्यो करून जैत जोडलें.
ते पयलीं टॉस हारल्या उपरांत पयलीं बॅटींग करपी इंग्लंडान 9 विकेटी वगडावन 282 धांवड्यो केल्यो. जॉनी बॅयरस्टो (33) आनी डॅव्हिड मलान (14) हांणी आपल्यो विकेटी वगडायल्यो. हॅरी ब्रुकाक (25) ताकतीक म्हारग पडली. मोईन अलीन (11) निर्शेणी हाडली. रुट आनी मुखेली जोस बटलर हाणें 70 धांवड्यांची भागिदारी केली. पूण, मॅठ हॅन्रीन बटलराक 43 (42 बॉल) धांवड्यांचेर तंबूची वाट दाखयली. लिएम लिव्हिंगस्टोन (0) चुकीचो शॉर्ट खेळून कॅच बाद जालो. जो रुटाच्या संघर्शाक फिलिप्सान ब्रेक लायलो. रुटान 86 बॉलांनी चार चवके आनी 1 सक्याचे मजतीन 77 धांवड्यो करून बोल्ड जालो. मॅट हॅन्रीन तीन विकेटी घेतल्यो. क्रिकेटीच्या इतिहासांत पयलेच खेपे सगले 11 खेळगडे दोट्टी धांवसंख्या करपाक शकले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
