भांगरभूंय | प्रतिनिधी
उमेश नायक: पीर्ण श्रीशांतादुर्गा विद्यालयांत गांधी, शास्त्री जयंती उमेदीन
म्हापशें: आयच्या वाडपी हिंसात्मक वातावरणांत अहिंसा आनी शांततायेचो संदेश दिवपी महात्मा गांधींचो उणाव दिसून येता. मनशांतलें मनीसपण सांबाळून दवरपाचें आसत जाल्यार गांधी विचारांचें अध्ययन करून तें कृतींत देंवोवंक जाय अशें पीर्ण हांगासरल्या श्रीशांतादुर्गा उच्च माध्यमीक विद्यालयाचे प्राचार्य उमेश नायक हांणी सांगलें.
विद्यालयांत महात्मा गांधी आनी लाल बहादूर शास्त्री हांची जयंती व्हड उमेदीन मनयली. ह्या वेळार माचयेर मुख्याध्यापिका राजनिता सावंत हाजीर आशिल्ल्यो.
आयच्या चंगळवाद जिणेशैली पसून पयस रावपा खातीर सहिष्णुता, सर्वधर्म समभाव, सादें रावप आनी उंचेली विचारसरणी ही महात्मा गांधींचीं जिणेमुल्यां विद्यार्थ्यांनी आपणावचीं अशें आवाहन मुख्याध्यापिका राजनीता सावंत हांणी केलें.
कार्यावळीचे सुरवेक महात्मा गांधी तशेंच लाल बहादूर शास्त्री हांच्या फोट्याक प्राचार्य नायक हांणी फुलांहार घालो. ह्या वेळार विद्यार्थी अमोल साईदत्त परब, एरन सोरेस, पृथा खलप हांणी लाल बहादूर शास्त्रींची वेशभुशा सादर केली.
मध्यमीक विद्यालयाच्यो विद्यार्थिंनी श्रेया चोडणकार, यक्षी देसाय जाल्यार उच्च माध्यमीक विद्यालयाचे अश्वीन नायक हांणी मनोगत उक्तायलें. प्राध्यापक लक्ष्मण माजीक हांणी कार्यावळीचें सुत्रसंचालन केलें.
उपरांत श्रमदान कार्यावळी खाला गांवांत नितळसाण मोहीम राबयली. राष्ट्रीय सेवा येवजण पदाधिकारी प्राध्यापिका रचना परब हांच्या मार्गदर्शना खाला शालेय वाठार, तळपवाडो, पीर्ण बाजार वाठारांतलो कोयर आर्यन नायक, रिया च्यारी, भावेश नायक, धनश्री नायक, मंदा नायक, श्रीयश पेडणेंकार, सोहम नायक, प्रीती कांबळी, अजीत झोरे, सिया सावळ आनी हेरांनी एकठांय केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
