पदकांचो विक्रम!!

भांगरभूंय | प्रतिनिधी

खेळगड्यांनी केन्नाच धादोशी आसपाक जायना. बऱ्यांतली बरी कामगिरी तांणी करपाक जाय. पूण ते खातीर तांकां बरें प्रशिक्षण, मानसीक शांती, पुश्टीक आहार मेळप गरजेचो.

अाशियायी सर्तींत बुधवारचो दीस आमच्या देशा खातीर इतिहासीक थारलो. आमी पयलेच फावटी पदकांचो 71 आंकडो हुपलो. 2018 त आमी हो पराक्रम केल्लो. अजून कांय खेळांनी आमकां भांगरा सयत हेर पदकां मेळटलीं. काल रातीं 8 मेरेन वट्ट पदकांचो आंकडो 81 चेर पाविल्लो. 25 जून 1983 दिसा भारतान बळिश्ट वेस्ट इंडिजाक हारोवन वर्ल्ड कप क्रिकेट सर्त जिखली आनी कांय वर्सां भितर भारतांत क्रिकेटीचें वारें व्हांवपाक लागलें. कायम फाटल्यान उरपी भारतीय पंगड पयल्या तीन पंगडां मदीं आयलो. आतां ह्या आशियायी खेळां सर्तीच्या येशाक लागून भारतांत खेळाचें वातावरण तयार जावं, एका परस एक खेळगडे वयर सरूं. तशे आमी आशियायी सर्तींत अजून फाटीं आसात. पूण पयलेच खेप इतलीं पदकां मेळिल्ल्यान आमच्या सध्याच्या आनी फुडाराच्या खेळगड्यांक आत्मविस्वास येतलो हातूंत दुबाव ना.
भारत तसो पयलीं हाॅकींत राजा आशिल्लो. उपरांत स्पेन, जर्मनी बी मुखार पावले. फुटबाॅलांत आमी आॅलिंपिकांत खेळ्ळ्यात. तातूंत गोंयकार खेळगडेय आशिल्ले. पूण उपरांत आमी फाटीं फाटीं वचत रावले. आयज ल्हान देश पसून आमचे परस खूब फुडें आसात. आमी संवसारीक फुटबाॅल सर्तीक पात्र पसून जायनात. आॅलिंपिकाक आमकां कुस्ती, बाॅक्सिंगेंत पदकां मेळटात. शर्यतींत आमच्या पी. टी. उषा आनी मिल्खा सिंग हांकां कांश्या पदक मेळपाचें. शर्यतींत आमी अजून फाटीं आसात. चिनांतले हे आशियायी सर्तींत पारुल चौधरीन 5000 मिटर शर्यतींत भांगरा पदक जिखलें. हे शर्यतींत ही कामगिरी करपी ती पयली भारतीय. क्रिकेट, हाॅकी, नेमबाजी हातूंत आमकां पदकाची आशा आसा. भालोफेकींत नीरज चोप्राक भांगरा पदक मेळ्ळां. निदान भारतान वट्ट 100 पदकां जिखचीं, अशें दरेका भारतीयाक दिसता आसतलें. हें शक्य आसा.
भारताक काल सांज मेरेन 18 भांगर, 31 रुपें आनी 32 कांश्या मेळून 81 पदकां मेळिल्लीं. चीन सदचे भशेन पयल्या क्रमांकाचेर आसा. 168 भांगर, 93 रुप्यां आनी 51 कांश्या पदकां मेळून तांचो आंकडो 312 चेर पावला. जपानान 36 भांगराचीं, 51 रुप्याचीं आनी 56 काश्याचीं मेळून 143 पदकां जोडल्यांत, तर भारता मुखार आशिल्ले द. कोरियेन 33 भांगर, 44 रुपें आनी 68 कांश्यां मेळून 145 पदकां मेळयल्यांत. पदकांचो तक्टो पळयलो काय चीन आनी दुसऱ्या क्रमांका वयल्या जपाना मदीं कितलो फरक आसा तें जाणवले बगर रावना. चीन पदकां मेळोवपाक आपल्या खेळगड्यांक कशे तयार करतात, ताचो खरो अभ्यास प्रत्येक देशान करपाक जाय. सोशल मिडियाचेर उडटात त्यो वावड्यो वाचून, ते खेळगड्यांचे ल्हानपणारुच हाल हाल करतात, म्हूण तांकां पदकां मेळटात, अशें म्हणप हें स्वताचें सांत्वन करपा सारकें! आमचे आनी चीनाचे संबंद तशें बरे नात, तरीय तांच्या खेळां मळा वयल्या येशाचें गुपीत सोदपाक जाय, ताचे प्रमाण आमीय मेहनत घेवन पदकांचो आंकडो वाडोवपाक जाय. हे सर्तींत आमी बरी कामगिरी केल्या. फुडल्या राष्ट्रकूल, आॅलिंपीक सर्तींत हेच येस कायम उरूं. आतां गोंयांत राष्ट्रीय खेळां सर्त जाता. तातूंत आमच्या खेळगड्यांक राष्ट्रीय, आंतरराष्ट्रीय खेळां नायक पळोवपाक मेळटले.
आशियायी खेळां सर्त 1951 त दिल्लींत सुरू जाली. त्या वेळार आमकां 51 पदकां सयत दुसरो क्रमांक मेळयिल्लो. उपरांत 57 पदकां मेळ्ळीं तीं 1982 त. 1990 त आमी पयल्या 10 त पसून नाशिल्ले. 1998 सावन आमची कामगिरी सुदारत गेली. 2006 त देशा भायर पयलेच खेप आमी 50 + पदकां जिखलीं. 2010 त 65, 2018 त 70 आनी अंदूं 81 +. हांगझाऊ आशियायी सर्त भारतीयांच्या कायमची लक्षांत उरतली, हे दिकेन प्रवास सुरू आसा. सर्त सोंपता म्हणसर पदकांचो नवो विक्रम दिसतलो!! खेळगड्यांनी केन्नाच धादोशी आसपाक जायना. बऱ्यांतली बरी कामगिरी तांणी करपाक जाय. पूण ते खातीर तांकां बरें प्रशिक्षण, मानसीक शांती, पुश्टीक आहार मेळप गरजेचो. तांचे कामगिरीचेर तांची निवड जावपाक जाय. मात हें करतना राजकी फुडाऱ्यांनी ह्या खेळां संघटणां पसून चार पावलां पयसूच रावल्यार बरें. भारतीय फुडाऱ्यां खातीर ही खूब कठीण गजाल. तरीय तांणी काळजाचेर फातर दवरून हो निर्णय घेवचो. कांय वर्सांनी भारतीय खेळगडे पदकाचेर पदकां जिखतना दिसतले. ही फुडाऱ्यां खातीरूय अभिमानाची गजाल थारतली!