भांगरभूंय | प्रतिनिधी
हळदीची रु. 8400 कोटी मेरेन निर्गत करपाची येवजण
नवी दिल्ली, खबरां संस्था ः केंद्र सरकारान राष्ट्रीय हळद मंडळाची थापणूक केल्या. ह्या मंडळा वरवीं हळदीचें उत्पादन आनी निर्यात वाडयतले. हळदीच्या वखदी गुणधर्मांक लागून हळदीचे निर्गतीचेर व्हड भर दितले.
प्रधानमंत्री नरेंद्र मोदी हांणी हळद मंडळ थापणूकेची घोशणा केली, ते प्रमाण अधिसुचोवणी जारी जाली. महाराष्ट्र, तेलंगण, मध्य प्रदेश आनी कर्नाटक ह्या राज्यांतले शेतकार बरोच तेंप हळद मंडळाची थापणूक करपाची मागणी करताले. हे संबंदी केंद्रीय मंत्री अनुराग ठाकुर हांणी सांगलें, भारताची वर्सुकी हळदीची निर्यात 2030 मेरेन 8,400 कोटी रुपया (100 कोटी डॉलर) करपाची सरकारान येवजण तयार केल्या. सद्या हळदीची निर्यात 1600 कोटी रुपया आसा.
हे मंडळ हळदीच्या संशोधनाक आनी उदरगतीक चालना दितले. तशेंच हळद उत्पादकांची क्षमताय आनी कुशळटाय वाडोवपाचेर भर दितले. हळदीचो दर्जो आनी अन्न सुरक्षेच्या मानकांक चालना दिवपा खातीर मंडळ वावुरतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
