भांगरभूंय | प्रतिनिधी
गणपतराव देसाय: केरी रक्तदान शिबिरांत 60 जाणांनी केलें रक्तदान
वाळपय: रक्तदानांतल्यान आमी खूबशा जाणांचें जीव वाटावंक शकतात. रक्तदाना बगर दुसरें श्रेश्ठदान आसूंक शकना. जात, धर्म, भेद विसरून रक्तदान करून दुसऱ्याचो जीव वाटायल्यार ताका देवाचो सांगात मेळटा. हाका लागून मनीसपण सांबाळून दरेकान रक्तदान करचें. रक्तदाना विशीं आशिल्ले गैरसमज पयस जावप सामकें गरजेचें आसा. तशें जायत जाल्यार रगताक लागून जावपी मरणांची संख्या उणी जावंक शकता.
केरी सत्तरींत समाजीक कार्यकर्ते व्यंकटराव उर्फ बबन राणे हांणी स्वता फुडाकार घेवन फाटल्या कितल्याशाच वर्सां सावन रक्तदान शिबिराचें आयोजन करून समाजांत वेगळ्यावेगळ्या प्रकारचो आदर्श निर्माण केला. तांच्या आदर्शतांतल्यान वेगळ्या प्रकारचें उदाहरण निर्माण जावंक लागलां. हाका लागून दरेकान तांचो आदर्श बाळगून स्वताय अशेच तरेचे समाजाचे उपेगी उपक्रम आयोजीत करचे अशी विनंती उद्देजक गणपतराव देसाय हांणी केली.
केरी श्रीसांतेरी आजोबा देवस्थानाच्या प्रांगणांत आयोजीत केल्ल्या रक्तदान शिबिराचें उक्तावण केले उपरांत ते उलयताले.
वेंकटराव उर्फ बबन राणे आनी तांच्या बरें मागप्यांनी रक्तदान शिबिराचें आयोजन केल्लें. फाटल्या 15 वर्सां सावन ते सेगीत 2 ऑक्टोबर दिसा रक्तदान शिबीर आयोजीत करतात. ह्या वेळार वट्ट 60 जाणांनी हातूंत वांटो घेतलो. हातूंत 51 दादले आनी 9 बायलांचो आस्पाव आशिल्लो.
ह्या उक्तावण सुवाळ्याक समाज कार्यकर्ते व्यंकटराव राणे, आजोबा देवस्थान समितीचे पदाधिकारी रामनाथ गांवस, अमर सूर्यवंशी, विश्राम नायक, अॅड. उमेश गांवस, हरूण शेख, गोवा मॅडिकल कॉलेजीच्या रक्तपेढी विभागाच्यो डॉ. कायरा हांची खासा उपस्थिती आशिल्ली.
ह्या वेळार उलयतना वेंकटराव उर्फ बबन राणे हांणी सांगलें, समाजांत आयज रक्ताच्या उणावाक लागून खूबशा जाणांक मरण येवंक लागलां. मनीसपणाच्या धर्मांतल्यान दरेकान दुसऱ्याचो जीव वाटावप गरजेचें आसा. रक्तदान हें सर्वश्रेश्ठ दान आसता. हातूंत मेळपी आनंद एक वेगळोच आसता. म्हणून फाटल्या 15 वर्सां सावन अशे तरेचो उपक्रम राबोवन ते खातीर योगदान दिवपाचो यत्न आपूण करीत आशिल्ल्याचें ह्या वेळार तांणी म्हणलें.
ह्या उपक्रमाक बरें मागपी आनी इश्टांचो सांगात मेळत आशिल्ल्यान अशे तरेचे उपक्रम येसस्वी जायत आसतात अशेंय तांणी मुखार उलयतना म्हणलें. फुडारांत अशा उपक्रमाच्या माध्यमांतल्यान समाज विकासाक चालना दिवपाचो यत्न दरेकान करप गरजेचो आसा अशेंय राणे हांणी म्हणलें.
सुरवातेक दिवली पेटोवन कार्यावळीचें उक्तावण केलें. माचयेर हाजीर आशिल्ल्या मानेस्तांक फुलांतुरो भेटोवन येवकार दिलो.
ही कार्यावळ येसस्वी करपा खातीर संजय खोर्जुंवेंकार, गजानन मांद्रेंकार, साईनाथ काणेकार आनी केरी आजोबा देवस्थान समितीच्या सगल्या पदाधिकाऱ्यांचे विशेश सहकार्य मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
