भांगरभूंय | प्रतिनिधी
म्हजें कुळार साल्वादोर द मुन्द, आल्त पर्वरे. केन्नाय दोन दीस थंय राबित्याक वतकच मम्मीच्यो समस्या आयकुच्यो पडटात. तकली कित्याक विरार जाल्या काय म्हणटात? नळाक पडल्या पाड. उदक ना जाल्यार कशें जातलें बाये? केन्नाय मनाक मारता तेन्ना पीर्र पीर्र चिळकी सोडटा. नाजाल्यार दिसभर श्यू, श्यू करून शिळोण्यो घालीत रावता. गोंय, गोंयकार हो निजाचो संगीतकार म्हणटात. ह्या नळांकूय तांचोच वसो लागलो सो दिसता. उदक ना जातकच तकली उसळटा. कित्याचेरुच लक्ष लागना. कपडे थंय कुसतात. पिवपाक लेगीत उदक मेळना. पाड पडिल्ल्यांनी बांयो पुरयल्यो. वखदाक लेगीत ना. हांची बुद्द पयलीं पुरवल्या देखून अशें घडटा.
आगा, लायट तरी सारकी खंय आसता? आपालिपा, आपालिपा, येता वता, येता वता. पीक पीक पीक पीक, चडसो काळोखूच. सगल्या राज्यांतूच काळखाचें साम्राज्य पातळ्ळां. नळ ना, लायट ना, देखून फोन करपाक गेलें, कर्मा! तोवूय डॅड. बिलां येतात तीं पळोवपाचीं नात. पयर हांकां लायटीचें बील पळोवन घुंवळूच आयली. कलीयूग हें. अच्छेव आयला हांचेर. हो सांवार बऱ्याचो न्ही. लयाक वचपाची चिन्नां हीं. आतांच उपाय केले नात जाल्यार घट्टाण जातलें आमचें. भ्रश्टाचार तर सामकोच वाडला. कांतीर चरतें वा खोरोज वाडत वच्ची तसो तो वाडटा. जण एकल्याक खावपाक जाय. येतीश्ट आडबऱ्यांनी… मागीर प्रगती कसली जातली? सगलो कारभार बेजबाबदार. ताळतंत्र ना. खंयचीय सुवात ना जंय राजकारण रिगूंक ना. हें राजकारण म्हणल्यार मुदलांत गजकरण. सगली वाट हाकाच लागून जाल्या. सुवार्थ तेंगशेर पावतकच अशेंच जावपाचें. मोह आनी लोभ बळावतकच हळशीक वाडटलीच.
गांधीजी रामराज्य करूंक सोदताले. देवा पाव. नशीब आयज गांधीजी सारके मनीस ना म्हणून. जीव तळमळपाचो तांचो हो चिखल पळोवन. आमी गांधीजींची जयंती करतात. फोटोक हार घालतात. भाशणां ठोकतात. तांचे विचार कितपत आचरणांत हाडटात? म्हजी जाल्यार तांचे नांव लेगीत घेवपाची लायकी ना. म्हज्यान बाये कशेंच सोंसना. म्हारगायेक उजो पेटला. नुस्त्या परस भाजी म्हारग. जीवन होच एक प्रस्न जाला. बरीं सदाचारीं मनशां वखदाक मेळपाक कुस्तार. म्हजे तकलेंत सगलोच घोसाळ्याचो काथो जाला.
कितें म्हळें? पंचायतींत उबी राव म्हणून? पळोवया. मनांत आसा. पंचायत वेंचणुकांनी आमकां बायलांक सरपंच जावपाक राखीव सीट दवरल्यात. खरें म्हणल्यार म्हाका पाॅलिटिक्स मात्तूय आवडना. पूण सगळेच बरे मनीस कुशीक सरल्यार हळशीक कोणे निवळ करपाची? सान्न कोणे मारपाची? एकल्यान तरी यत्न केल्यार वजन मात्शें हलकें जावचें ना? म्हजे परीन हांव यत्न करतलीं. वेंचून आयलीं जाल्यार सगल्यो समस्या सुटाव्यो करपाचो यत्न करपाक वावुरतलीं.
हीं पोकीं आस्वासनां न्हय आं. म्हाका कितें व्हड- व्हड राजकारणी जावपाचें ना. हांव एक सादी तुजी मम्मी, लोकांची सेवा करपी नम्र सेवक.
राधिका कामत सातोस्कार
मुजावर वाडो- सांखळी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
