भांगरभूंय | प्रतिनिधी
गट पांवड्यार सहज जैतां जोडपी भारताच्या दादल्यांच्या हॉकी पंगडा मुखार आयज आशियायी खेळांतले सेमी फायनलींत दक्षीण कोरियाच्या रुपान पयलें खर आव्हान आसतलें.
संवसारीक क्रमवारींत तिसरे सुवातेर आशिल्ल्या भारतान गट पांवड्यार पांच मॅचींनी खेळटना 58 गोल केल्यात जाल्यार फकत पांच गोल घेतल्यात. पॅरीस ऑलिम्पिकाचो कोटा मेळोवपाच्या उद्देशान खेळपी भारतान उजबेकिस्तानाक 16-0, सिंगापूराक 16-1, पाकिस्तानाक 10-2, सध्याचो वस्ताद जापानाक 4-2 आनी बांगलादेशाक 12-0 अशा फरकान हारयला. 2018तले आशियायी खेळांत लेगीत भारताची स्थिती सादारण अशीच आशिल्ली. पूण, सेमी फायनलींत ताका मलेशिया कडल्यान शुटआवटांत 7-6 फरकान हार घेवची पडिल्ली. भारतान निमाणे खेपे भांगरा पदक 2014त इंचियोनांत जिखिल्लें. जाल्यार कोरियान निमाणे खेपे भांगरा पदक 2006 दोहा आशियायी खेळांत जिखिल्लें.
आमी उत्कृश्ट सुरवात केल्या. ताका लागून आमचो आत्मविस्वास बरोच वाडला. सकारात्मक विचार घेवन आमी सेमी फायनलींत खेळटले. पूण, कोरिया आड आमकां सादूर रावचे पडटले. कोरिया लेगीत पुराय तयारेन मैदानांत देंवतलो अशें भारताचो मुखेली हरमनप्रीत सिंगान म्हणलें.
अजून मेरेन 12 गोल करपी हरमनप्रीत स्वता जबरदस्त फॉर्मांत आसा. सुरवातीक भारताक पॅनल्टी कॉर्नराचेर गोल करपाक समस्या आयिल्ली. पूण, आतां हरमनप्रीत, वरुण कुमार आनी अमीत रोहिदास हांणी फॉर्म मेळयला. मनदीप सिंग, ललित उपाध्याय, गुरजंत सिंग आनी अभिषेक हांणी फिल्ड गोल केल्यात. अभिषेकान सगल्या मॅचींनी बरें प्रदर्शन केलां.
भारताचे बचाव फळीचो अजून मेरेन कस लागूंक ना हो मुख्य प्रशिक्षक क्रेग फुल्टोनाक हुस्को जाला. जापाना आडची मॅच सोडली जाल्यार भारताच्या बचाव फळीचो कस लागूंक ना. गट पांवड्या मॅचींनी भारताचे गोलकीपर पी आर श्रीजेश आनी कृशन बहादूर पाठक हे प्रेक्षकाचे भुमिकेंत आशिल्ले.
कोरियाची ताकद आमकां खबर आसा. आमचे कडेन लेगीत बळिश्ट पंगड आसा. तांकां आमचेर शेक दवरपाक दिवचे नात अशें हरमनप्रीतान म्हणलें.
अंदूं जाल्ले आशियायी चॅम्पियन्स ट्रॉफींत भारतान दक्षीण कोरियाक 3-2 फरकान हारयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
