भांगरभूंय | प्रतिनिधी
खबरां संस्था
हांगझोऊः आशियाई खेळां सर्तीची सुरवात भारताच्या दादल्यांच्या क्रिकेट पंगडान जैतान केली. पयलेच मॅचींत तांणी नेपाळाक 23 धांवड्यांनी हारयलें. अव्वल मानांकीत पंगड आशिल्ल्यान भारताक सरळ सेमीफायनलींत खेळपाची संद मेळ्ळ्या. भारतान टॉस जिखून पयलीं खेळून 4 आवट 202 धांवड्यो केल्यो. यशस्वी जयस्वालान 49 बॉलांत (100) शेंकडो केलो. भारता वतीन रिंकूं सिंगान 37, कॅप्टन ऋतुराज गायकवाड आनी शिवम दुबेन देरकी 25 धांवड्यो केल्यो. नेपाळाच्या दीपेंद्र सिंगान दोन विकेटी घेतल्यो. सोमपाल कामी आनी लामिछान दरेकी एक विकेट घेतली.
नेपाळी पंगड 9 विकेटी वोगडावन 179 धांवड्यो करपाक शकलो. दिपेंद्र सिंगान सगल्यांत चड 32 धांवड्यो केल्यो. संदीप जोरा आनी कुशल मल्लान दरेकी 29 धांवड्यो, कुशर भुरटेलान 28 आनी करणान 18 धांवड्यो केल्यो. रवी बिश्णोय आनी आवेश खानात दरेकी तीन विकेटी घेतल्यो. भारता वतीन पयली मॅच खेळपी रवी साई किशोरान फिल्डिंगेंत विक्रम केलो.
यशस्वी आनी ऋतुराज जोडयेन पॉवरप्लेंत 62 धांवड्यांची भर घातली. जयस्वालान 22 बॉांत आपलो अर्द शेंकडो पुराय केलो. ऋतुराजान 23 बॉलांत 25 धांवड्यो केल्यो. दीपेंद्र सिंग एरीत ताका कॅच आवट केलें. तिलक वर्मा 10 बॉलांत फकत दोन धांवड्यो करपाक शकलो. शिवम दुबेन जयस्वाल वांगडा भारताच्यो 150 धांवड्यो पुराय केल्यो. जयस्वालान 48 बॉलांत 8 चौके आनी 7 सक्यानी आपलो शेंकडो केलो आनी तो आवट जालो. रिंकू सिंग, शिवम दुबेन 22 बॉलांत 52 धांवड्यांची नाबाद भागिदारी करून भारताक 202 धांवड्यांचेर व्हेलें.
202 धांवड्यांचो फाटलाव करतना नेपाळाची सुरवात बरी जाली. 29 धांवड्यांचेर आवेश खानान असीफ शेखान 10 धांवड्यांचेर आवट करून तांकां पयलो धपको दिलो. पॉवरप्ले सोपले उपरांत नेपाळीची 1 आवट 46 धांवड्यो जाल्ल्यो. आर साई किशोरान कुशल भुरटेलाक 28 धांवड्यांचेर बाद करून भारताक दुसरे येस मेळोवन दिले. ते उपरांत कुशल मालाय 29 धांवड्यांचेर रवी विश्णोयाचो बळी थारलो. हेच ओव्हरीत विश्णोयान नेपाळचो कॅप्टन रोहिताक आवट करून नेपाळाची स्थिती 11 ओव्हरींत 4 आवट 77 अशी केली.
साई किशोराचो विक्रम
आर साई किशोरान भारता वतीन हे मॅचींत पदार्पण केलें. ह्या स्पीनरान हे मॅचीं तीन कॅची घेवन एक खासा विक्रम आपल्या नांवार केलो. पदार्पणात तीन कॅची घेवपी तो पयलो भारतीय फिल्डर थारलो. ताका बॅटिंग करपाची संद मेळ्ळी ना. मात आपल्या चार ओव्हरींत ताणे 25 धांवड्यो दिवंन एक विकेट घेतली. भारता खातीर पयली मॅच खेळपी साई किशोर राष्ट्रगीताच्या वेळार भावूक जालो आनी ताच्यो दोळ्यांत दुकां आयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
