भांगरभूंय | प्रतिनिधी
नोकरी करतना भलायकेची जतनाय घेवप सगळ्यांकच जमता अशें ना. कांय जाण जिम आनी योगा सारकिल्ल्यो गजाली नोकरी वांगडाच आपले जिणे पद्दतीचो एक भाग करतात. पूण कांय जाणांक वेळ नाशिल्ल्यान ह्या गजालीं कडेन दुर्लक्ष जाता. सध्या ऑफिसांत काम करपी लोकांकय काळजाचो आताक येवपाक लागला.
संवसारभर काळजाचे दुयेंस हें मरण येवपाचें मुखेल कारण. दर वर्सा 1.79 मिलियन लोकांक ह्या कारणाक लागून मरण येता. इंडियन काउन्सिल ऑफ मेडिकल रिसर्च हे संस्थेन केल्ल्या अभ्यासा प्रमाण भारतांतल्या सुमार 60 टक्के लोकांक काळजाचे दुयेंस आसात.
तज्ञांच्या मतान काम करपी लोक कांय उपाय करून काळजाचे दुयेंस टाळूंक शकतात.
१) कॉफी पियेवप उणें करप
ऑफिसांतले काम करपी लोक दीसभर उर्जा मेळोवपा खातीर कॉफीचेर आदारून आसतात. कॉफी पियेवप भलायके खातीर बरें आसलें तरी चड कॅफी पियेल्यार काळजाची गती वाडटा आनी रगतदाब वाडटा. ज्याका लागून तुमकां भंय दिसूंक शकता आनी अशे स्थितींत काळजाचो आताक जावं येता. हें टाळपाखातीर फकत सकाळीं कॉफी घेवची.
२) निरोगी आहार
ऑफिसांतल्या वेंडिंग मशीनांतल्यान रोखडेंच कितेंय खावप सोयीचें थारूंक शकता. पूण सदांच पोशक पर्याय निवडप कुडीक आनी काळजाक फायदेशीर आसता. देखून तुमची उर्जेची पातळी सांबाळपाक आनी काळीज निरोगी दवरपाक पोशक आहार घेवचो.
३) पुराय न्हीद घेवप
कामाचेर वयचे पयलीं फावो ती न्हीद जाव ना जाल्यार थकवा, चिडचिडेपण येता आनी कामाचेर लक्ष केंद्रीत जायना. न्हीद नाशिल्ल्यान मनशाच्या कामाच्या पातळेचेर, तशेंच काळजाचे भलायकेचेर परिणाम जाता. एका संशोधनाच्या मतान उण्या प्रमाणांत न्हीद घेवपी लोकांक काळजाचे दुयेंस जावपाचो धोको 29 टक्क्यांनी वाडटा. न्हीद उणी जाल्यार हें धोक्याचे थारूंक शकता. ताका लागून रगतदाब आनी काळजाचो आताक येवपाचोय धोको वाडटा.
४) क्रोनिक ताण उणो करप
सायन्टिफिक रिपोर्ट्स ह्या नेमाळ्यांत उजवाडाक आयिल्ल्या अहवाला प्रमाण ताण हार्मोन कॉर्टिसोलाची पातळी चड आशिल्ल्या लोकांक काळजाचो आताक येवपाचो चड धोको आसता. ताण पडल्यार रगतदाब वाडटा आनी संभाव्य काळजाच्या दुयेंसांचो धोको वाडटा. ताण उणो करपाक योग आनी ध्यान करचे.
५) चड वेळ बसून रावचे न्हय, व्यायाम करचो
चड वेळ बसल्यार डीन वेन थ्रोम्बोसिसचो धोको वाडूंक शकता. जी रगत गोठेवपाची स्थिती आसा. दीसभर काम करतना उबे रावप, ताणप वा मदीं मदीं भोंवप अशे तरेन विसव घेवचे.
काम करपी लोक सदांच आपल्या कामांत घुस्पतात आनी भलायकेची योग्य जतनाय घेनात. पूण काळजाक भलायकेक बरी जीण केन्ना आपणावंक मेळटा हें समजून घेवप म्हत्वाचें. तुमी जिणे पद्दतींत वयले बदल करुं शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
