भारताचें आनीक एक सोंपें जैत

भांगरभूंय | प्रतिनिधी

भारताच्या दादल्यांच्या पंगडान आशियायी खेळांतल्या हॉकींत आनीक एक सोंपें जैत जोडलें. अ गटांतले आपले निमाणे मॅचींत ताणें बांगलादेशाक 12-0 अशा फरकान हारयलो. भारतान सगल्यो पांचूय मॅची जिखल्यो. भारतान अजून मेरेन 58 गोल केल्यात, जाल्यार फकत पांच गोल घेतल्यात.

मुखेली हरमनप्रीत सिंग आनी मनदीप सिंग हांणी हॅट्रीक केली. अभिषेकान दोन, जाल्यार ललित उपाध्याय, अमित रोहिदास, अभिषेक आनी नीलकांत शर्मा हाणें दरेकी एक गोल केलो.

भारतान पयलो गोल दुसऱ्याच मिनटाक केलो. मनदीपान डी एरिया भितर मारिल्लो शॉर्ट बांगलादेशाच्या अश्रफुलाच्या पांयाक लागलो. हार्दिकान पॅनल्टी शॉर्ट घेतलो. ताणें मुखेली हरमनप्रीत सिंगाचे दिकेन बॉल पास केलो. हरमनप्रीतान कसलीच चूक करिनासतना बॉल गोलपोस्टांत घालो.

पयल्या गोला उपरांत रोखडोच तिसऱ्या मिनटाक दुसरो गोल पॅनल्टी कॉर्नराचेर केलो. ह्या वेळार लेगीत हरमनप्रीतान कसलीच चूक करूंक ना. मनदीप सिंगान भारता वतीन तिसरो गोल केलो. अभिषेकाच्या पासाचेर ताणें बॉल गोलपोस्टांक घालो.

चवथो गोल 23व्या मिनटाक जालो. अभिषेकाच्या पासाचेर ललित उपाध्यायान हो गोल केलो. हरमनप्रीत सिंगान ड्रॅग फ्लिकान बॉल गोलपोस्टांत घालपाचो यत्न केलो. पूण, बॉल परतून येवन थंय उबो आशिल्ल्या मनदीपाक मेळ्ळो. ताणें संदीचो फायदो घेत रिबावण्डाचेर गोल केलो. 28व्या मिनटाक भारताच्या खात्यांत सवो गोल जमा जालो. ह्या वेळार हरमनप्रीत मैदानांत नाशिल्लो. ताचे गैरहाजेरेंत वरुण कुमार आनी अमित रोहितस हांणी जापसालदारकी सांबाळ्ळी. रोहिदासान गोल करून भारताक 6-0 असो मुखार व्हेलो. हरमनप्रीतान भारताचो सातवो गोल केलो. ताणें 32व्या मिनटाक गोल करून आपली हॅट्रीक पुर्ण केली. अबिषेकान 41व्या मिनटाक आठवो आनी मनदीपान 46व्या मिनटाक णववो गोल केलो. अभिषेकान आनीक एक गोल करपाचो यत्न केलो. पूण, ताका येस मेळूंक ना. ताच्या लागसार उबो आशिल्ल्या निलकांत शर्मान रिबावण्डाचेर गोल केलो. सुमितान 56व्या मिनटाक भारता वतीन उत्कृश्ट गोल केलो. भारताच्या खात्यांत 12वो गोल 56व्या मिनटाक आयलो. ह्या गोलाचेर बांगलादेशान रिव्ह्यू घेतलो.पूण, निर्णय भारता वटेन लागलो.

भारतान आपले पयले मॅचींत उजबेकिस्तानाक 16-0, दुसरे मॅचींत सिंगापूराक 16-1, तिसरे मॅचींत जपानाक 4-2, चवथे मॅचींत पाकिस्तानाक 10-2 अशा गोल फरकांनी हारयिल्लो.