भांगरभूंय | प्रतिनिधी
नवी दिल्ली, खबरां संस्था: भारताचे राष्ट्रपिता महात्मा गांधी हांचे जयंती निमतान प्रधानमंत्री नरेंद्र मोदी हांणी राजधानी दिल्लीच्या राजघांटार वचून गांधींक अभिवादन केलें. मोदी हांचे वांगडा कॉंग्रेस अध्यक्ष मल्लिकार्जुन खरगे, लोकसभा अध्यक्ष ओम बिर्ला, दिल्लीचे उपराज्यपाल वी. के. सक्सेना, उपराष्ट्रपती जगदीप धनखड हांणी राजघांटाचेर बापूंक आर्गां ओंपलीं.
‘‘गांधी जयंती निमतान हांव महात्मा गांधींक नमन करतां. तांचे शिकवणेक लागून आमची उदरगत जाल्या. महात्मा गांधींचो प्रभाव संवसारीक आसा. ते पुराय मनीसजातीक एकवट आनी करुणेची भावना फुडें व्हरपा खातीर प्रेरणा दितात. तांचीं सपनां पुराय करपा खातीर आमी सदांच यत्न करतले. महात्मा गांधींच्या विचारांनी दरेका तरणाट्यांक तांचें सपन पुराय करपा खातीर बळ मेळूंदी. जाका लागून सगळे कडेन एकवट आनी सद्भावना वाडटली.’’ अशें प्रधानमंत्री मोदी हांणी ट्विट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
