स्क्वॉश, टॅनीसांत भांगरा पदकां

भांगरभूंय | प्रतिनिधी

चीनाच्या हांगझोउ शारांत चालू आशिल्ले 19वे आशियायी खेळां सर्तीच्या सातव्या दिसा भारतान 2 भांगरा पदकां आनी एक रुप्या पदका सयत वट्ट तीन पदकां जिखलीं. भारतान अजून मेरेन 10 भांगरा पदकां जिखल्यात.

भारतान दादल्यांच्या स्क्वॉश प्रकारांत आनी टॅनिसांतल्या मिश्र गटांत भांगरा पदक जिखलें.

स्क्वॉशाचे फायनलींत भारतान पाकिस्तानाक 2-1 अशा फरकान हारयलो. फायनलींतले पयले मॅचींत पाकिस्तानाच्या नासिर इक्बालान महेश माणगावकराक 3-0 अशा फरकान हारयलो. दुसरे मॅचींत भारतान पुनरागमन केलें. सौरव घोषालान असीम मुहम्मदाक 3-0 असो हारयलो. तिसरे मॅचींत अभय सिंगान नूर जमान हाका 3-2 फरकान हारयलो. अशे तरेन भारतान फायनल 2-1 फरकान जिखून भांगरा पदक जिखलें.

ते पयलीं रोहन बोपन्ना आनी ऋतुजा भोसले हे जोडयेन टॅनिसांतल्या मिश्र गटांत भांगरा पदक जिखलें. भांगरा पदकाचे मॅचींत भारताचे जोडयेन चीनी तायपेचे एन शुओ लिआंग आनी त्सुंग हाओ हुआंग हे जोडयेक 2-6, 3-6 (4-10) अशा फरकान हारयली. पयलो सेट वगडायल्या उपरांत दुसऱ्या सेटांत भारतान जबरदस्त पुनरागमन केलें.

दुसऱ्या सेटांत भारताची जोडी 4-3 अशी फाटीं आशिल्ली. टायब्रेकरांत गेल्ल्या ह्या सेटांत भारताचे जोडयेन 3-6 (4-10) फरकान जैत जोडून भांगरा पदक मेळयलें.

भारतान टॅनीस खेळांत 2002तले बुसान आशियायी खेळां सर्तींत चार, 2006चे दोहा सर्तींत चार, 2010तले ग्वांग्झू सर्तींत पांच, 2014तले इंचियोन सर्तींत पांच आनी 2018त जकार्ता आशियायी खेळांत तीन पदकां जिखिल्लीं.

मजगतीं, अॅथलेटिक्सांतले 10 हजार मिटर रेसींत भारतीय धांवपी कार्तिक कुमारान (28ः25ः38 मिनट) रुप्या पदक जिखलें. गुलवीर सिंगान (28:17.21 मिनट) कांश्या पदक मेळयलें. भांगरा पदक बहरीनच्या बिरहनू बलेवान (28:13.62 मिनट) जिखलें.

नेमबाजींत 19 पदकां

नेमबाजींत सरबजोत सिंग आनी दिव्या टीएस हांणी 10 मिटर अॅर पिस्तोल मिश्र पंगड प्रकारांत रुप्या पदक जिखलें. भांगरा पदका खातीर जाल्ले मॅचींत भारताचे जोडयेक चीनाचे झांग बोवेन आनि जियांग रॅनक्सिन कडल्यान 16-14 अशा फरकान हार घेवची पडली.

भारतान अजून मेरेन नेमबाजी खेळां प्रकारांत 19 पदकां जिखल्यात. हातूंत 6 भांगरा पदकांचो, 8 रुप्या पदकांचो आनी 5 कांश्या पदकांचो आस्पाव आसा. आशियायी खेळाच्या 75 वर्सांच्या इतिहासांतलें नेमबाजींतलें हें सर्वोत्कृश्ट प्रदर्शन आसा. नेमबाजींत भारतान आपलो 2006तलो विक्रम मोडलो. दोहा आशियायी खेळांत भारतान 14 पदकां जिखिल्लीं. हातूंत तीन भांगरा पदकां, 5 रुप्या पदकां आनी 6 कांश्या पदकांचो आस्पाव आशिल्लो.

टेबल टॅनीसः बायलांच्या दोट्टी गटांतलें पदक निश्चीत

टेबल टॅनीसांतल्या बायलांच्या दोट्टी गटांत सुतिर्था आनी अयहिका मुखर्जी हे जोडयेन इतिहास घडयलो. भारताचे जोडयेन क्वॉर्टरफायनलींत संवसारीक वस्ताद आनी संवसारीक क्रमवारींत 16वे सुवाते वयले चीनाचे जोडयेक 3-1 अशा फरकान हारयली. ह्या जैता सयत भारताचें एक पदक निश्चीत जालें. भारतान ह्या गटांत पयलें पदक निश्चीत केलां.

मजगतीं, बायलांच्या एकोड्या गटांत मनिका बत्रा पदकाचे सर्तींतल्यान भायर पडली. क्वॉर्टरफायनलींत तिका चीनाचे यिडी वांग कडल्यान 2-4 फरकान हार घेवची पडली.

बॉक्सिंगः चवथें पदक निश्चीत, लवलीना, प्रिती, नरेंद्र सेमींत

बॉक्सिंगेंच्या 75 कील वजन गटांत लवलीना बोरगोहेन हिणें सेमी फायनलींत सुवात मेळयली. लवलीनान क्वॉर्टरफायनलींत कोरियाचे सुयेन सेओंग हिका 5-0 हारयली. ह्या जैतान लवलीनान पदक निश्चीत केलें.

54 कील वजन गटांत प्रिती पवारान सेमी फायनलींत सुवात मेळयली. प्रितीन क्वॉर्टरफायनलींत कजाकिस्तानाचे जैना शेकरबेकोवा हिका 4-1 हारोवन आपलें पदक निश्चीत केलें. ह्या जैता सयत तिणें पॅरीस ऑलिम्पिकाचो कोटा लेगीत मेळयलो.

दादल्यांच्या 92+कील वजन गटांत नरेंद्रान भारताचें बॉक्सिंगेंतलें चवथें पदक निश्चीत केलें. ताणें क्वॉर्टरफायनलींत इराणाच्या रमजानपुरडेलावर इमान हाका 5-0 हारोवन निमाण्या चारांतली सुवात निश्चीत केली.

सचिनान लेगीत क्वॉर्टरफायनलींतली सुवात निश्चीत केली. प्री क्वॉर्टरफायनलींत ताची मॅच कुवेताच्या टर्की बुथैला आड आशिल्ली. पूण, तो येवंक नाशिल्ल्यान सचिनाक फुडली चाल मेळ्ळी.

हॅण्डबॉलः बायलांच्या पंगडाक जैत

भारताच्या बायलांच्या पंगडान नेपाळाक हारोवन आशियायी खेळांतलें पयलें जैत जोडलें. भारतान 44-19 फरकान जैत जोडलें. भारता वतीन निधी शर्मान सगल्यांत चड 11 गोल केले. हाचे पयलीं भारत तीन मॅची खेळिल्लो. हातूंतल्यो दोन मॅचींनी हारिल्लो, जाल्यार एक मॅच बादाबाद उरिल्ली.

वेटलिफ्टिंगः मीराबाई चानू चवथे सुवातेर

वेटलिफ्टिंगाच्या 49 कील वजन गटांत मीराबाई चानू 191च्या स्कोरा सयत चवथे सुवातेर उरली. स्नॅचांत मीराबाईन पयल्या यत्नांत 83 कील वजन उखल्लें. उपरांत 86 कीलाचे दोन यत्न फावल जाले. क्लीन अॅण्ड जर्काच्या पयल्या यत्नांत 108 कील वजन उखल्लें. दुसऱ्या आनी तिसऱ्या यत्नांत 117 कीलांत फावल जालो.

दुसरे वटेन बिंद्यारानी देवी बायलांचे 55 कील वजन गटांत पांचवे सुवातेर उरली. तिणें आपल्या पयल्या यत्नांत 109 कील वजन उखल्लें. दुसऱ्या यत्नांत 113 कील वजनांत क्लीन अॅण्ड जर्क करपाक अपेशी थारली. तिसऱ्या यत्नांत वट्ट 196 कील वजन उखल्लें. उत्तर कोरियाची कांग ह्युंग यंग हिणें 223 कील वजन उखलून संवसारीक विक्रमा सयत भांगरा पदक जिखलें.