भांगरभूंय | प्रतिनिधी
मध्य प्रदेश धर्मशास्त्र राष्ट्रीय कायदो विद्यापिठाचो निर्णय
ग्वाल्हेर, खबरां संस्था ः मध्य प्रदेशांतल्या विधी विद्यापिठान मासिक पाळी वेळार चलयांक सुटी दिवपाचो निर्णय घेतला. असो निर्णय घेवपी हें देशांतलें पयलें विद्यापीठ. मध्य प्रदेशांतल्या जबलपूरच्या धर्मशास्त्र राष्ट्रीय कायदो विद्यापिठान (DNLU) चलयांक मासिक पाळीची सुटी दिवपाचो निर्णय घेतला. विद्यापिठान नव्या सत्रां सावन मासिक पाळी सुटी घेवपाचो आदेश जारी केला.
विद्यापिठाचे प्रभारी कुलगुरू शैलेश एन हादली हांणी दिल्ले म्हायती प्रमाण, जायते दीसा सावन स्टुडंट बार असोसिएशनाचे वतीन मासिक पाळी सुटयेची मागणी सुरू आशिल्ली. हें मतींत दवरून ही सुटी दिवपाचो निर्णय घेतला. ही सुटी दर सत्रांत विद्यार्थ्यांक सांस्कृतीक आनी हेर म्हत्वाच्या कार्यावळींनी वांटो घेवपा खातीर दिवपी स सुटयेचो एक भाग आसतलो. तशेंच चलयांक मासिक पाळीच्या वेळार ह्यो सुटी घेवंक मेळटल्यो.
डीएनएलयूचे प्राध्यापक डॉ. प्रवीण त्रिपाठी हांणी प्रसार माध्यमांक सांगलें, मासिक पाळी सुटी दिल्यार चलयांक शारिरीक आनी मानसीक भलायके खातीर मजत जातली. मासिक पाळी विशीं समाजीक गैरसमजूय पयस जातले.
कांय म्हयन्यां आदीं स्पेनाचे संसदेन मासिक पाळीच्या वेळार सुटये संबंदी व्हड निर्णय घेतिल्लो. मासिक पाळीच्या खर दुखण्यांतल्यान ग्रस्त आशिल्ल्या बायलांक पेड़ लीव्ह वैजकी सुटी दिवपाच्या विधेयकाक संसदेन बिरेस्तारा मान्यताय दिली. असो कायदो करपी स्पेन हो पयलो युरोपीय देश.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
