भांगरभूंय | प्रतिनिधी
हरयाणा, खबरां संस्था ः हरियाणाच्या जिंदांत जिंदचे दुराना नावांचो एक गांव आसा, थंय दर घरांतले एक- दोन लोक परदेशांत आसतात. खंयचोय गांवचो तरणाटो आपल्या पांयांचेर उबो रावता म्हणसर तो उदरनिर्वाहाच्या सोदांत परदेशांत वता ही वर्सां सावन चलत आयिल्ली परंपरा जावन आसा. ह्या गांवांतले डझनभर तरणाटे फाटल्या पांच वर्सांत परदेशांत गेल्यात.
एका इंग्लीश दिसाळ्या प्रमाण, ह्या गांवांत एक- दोन तरणाटे चुकून मेळटले. हेर सगळे तरणाटे बरी नोकरी सोदपाक परदेशांत गेल्यात. दुराना गांवच्या लोकांनी सांगलें की हांगा खंयच्याय घरांतलीं भुरगीं 12 वी पुराय जातकच नोकरी सोदपाक लागतात. परदेशांत काम करप हें तांचे पयलें प्राधान्य आसता. तरणाट्यांक सहजपणान भायल्या देशांनी काम मेळटा. देखून तांची जोड बरी जाता.
गांवच्या लोकांच्या मतान ह्या गांवांत जायती घरां आसात, पूण गांवचे रस्ते आनी चौकांत सदांच शांतताय आसतात. गांवांतले जाण्टे केन्ना केन्ना गरजेच्या सुवातेर बसलेले दिसतात. गांवच्या रतन सिंह हाणें सांगलें की तांकां तीन भुरगीं आसात, तीं तीनूय सध्या हेर देशांनी काम करतात. तेच प्रमाण तेज सिंह हांणे सांगले आपल्या कुटुंबांत वट्ट 30 लोक आसात. तातूंतले 12 जाण परदेशांत आसात. हांगा रावपी लोक कामाक लागून गांवां भायर आसात.
तेज सिंह हांच्या म्हणण्या प्रमाण तांचे चली कुरुक्षेत्र विद्यापिठांत पयलो क्रमांक मेळयल्लो, पूण बरी नोकरी सोदपाक तेय परदेशांत गेले. भुरगीं तांकां सोडून पयसुल्ल्या देशांनी वतात तेन्ना दुख्ख जाता, पूण कितें करचें, आमच्या देशांत तरणाट्यांक काम मेळप कठीण जालां. भुरगीं परदेशांत वतात तेन्ना थंयच्यान खूब पयशे धाडटात, पूण शक्य तितले स्वता हांगा येवपाक टाळटात अशें त्याच गांवचे संदीप सिंग सांगता.
ह्या गांवाची वट्ट लोकसंख्या 2500 आसा. तातूंतले 30 टक्के लोक शीख समाजांतले आसात. ह्या गांवांतलीं सुमार 30 भुरगीं सध्या परदेशांत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
