भांगरभूंय | प्रतिनिधी
पणजीः पुर्तुगेझांच्या जुलमी राजवटींतल्यान मुक्त जावपा खातीर ज्या सुटके झुजाऱ्यांनी बलिदान दिलें तांची माहिती आमच्या भुरग्यांक दिवप आयज चड गरजेची आसा अशें समाज कल्याण तशेंच पुराभिलेख खात्याचे मंत्री सुभाष फळदेसाय हांणी म्हणलें. पुराभिलेख खात्यान केपें म्हाविद्यालयांत अभिलेखांचें एका दिसा खातीर प्रदर्शन दवरिल्लें. त्याच वेळार गोंय स्वातंत्र्याचें होमखण हो म्हायतीपट दाखयलो.
ह्या वेळार माचयेर ज्योती कुंकळकार, पुराभिलेख खात्याचे संचालक रोहीत कदम, डॉ. जयंती नायक, शिल्पा सावंत आनी डॉ. जॉयदीप भट्टाचार्य हाजीर आशिल्ले.
ह्या वेळार ज्योती कुंकळकार हांणी उलयतना म्हणलें, खंयच्याय राज्याची उदरगत पळयतना त्या राज्यांत कितल्यो व्हड इमारती आसात, कितले व्हडले पूल वा रस्ते आसात हाचे परस त्या राज्याचो सांस्कृतीक इतिहास कितलो आसा हाचे वेल्यान थारता.
ह्या वेळार मंत्री सुभाष फळदेसाय हांणी शिक्षणीक संस्थांक पुराभिलेख खात्यान प्रकाशीत केल्लीं इतिहासा वेलीं पुस्तकां भेट दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
