भांगरभूंय | प्रतिनिधी
खबरां संस्था
सिडनीः श्रीलंकेचो क्रिकेटीयर धनुष्का गुणतिलके हाका सिडनी न्यायालयान लिंगींक अत्याचार आरोपांतल्यान क्लीन चीट दिल्या. न्यायालयान आपल्या आदेशांत गुणतिलकेक सगल्या आरोपांतल्यान निर्दोश थारायलां. गुणतिलके आतां 11 म्हयन्यां उपरांत आपल्या मायदेशांत वचपाक शकतलो. ऑस्ट्रेलियेंत जाल्ले टी-20 वर्ल्ड कप सर्तीच्या वेळार एके चलयेचेर लिंगीक अत्याचार केल्ले खातीर ताका ऑस्ट्रेलियेंत अटक केल्ली.
क्लीन चीन मेळ्ळ्या उपरांत गुणतिलकेन मीडिया कडेन उलयतना फाटल्या 11 म्हयने आपले खातीर सामके पिडेचे आशिल्ले. आतां म्हजे जिवीन सुरळीत जातले आनी हांव मायदेशांत वचून क्रिकेटखेळपाक शकतोलों अशें सांगलें. 2022 वर्सा ऑस्ट्रेलियेंत टी-20 वर्ल्ड कप सर्तींत इंग्लंड- श्रीलंका मॅची उपरांत सिडनींत धनुष्काक श्रीलंका पंगड रावतालो त्या हॉटेलांतल्यान अटक केल्ली. ताणे 29 वर्सा पिरायेचे एके बायलेचेर लिंगीक अत्याचार करपाचो यत्न केल्लो असो आरोप आशिल्लो.
सिडनी न्यायालयान ताका जामीन दिवंक नाशिल्लो ताका ऑस्ट्रेलिया सोडपाक मेळ्ळी ना. 11 दिसां उपरांत दंड फारीक केल्या उपरांत ताका जामीन मेळल्लो. लिंगीक अत्याचाराचो आरोप जाल्या उपरांत श्रीलंकेन क्रिकेट मंडळान ताका सगल्या क्रिकेट फॉर्मेटांत खेळपाक बंदी घातिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
