भांगरभूंय | प्रतिनिधी
खबरां संस्था
हैदराबादः आयसीसी वन-डे संवसारीक क्रिकेट सर्तींच खेळपा खातीर बाबर आझम हाच्या फुडारपणा खाला पाकिस्तानी क्रिकेट पंगड बुधवारा राती भारतांत दाखल जालो. व्हो पंगड दुसरे फावट वन-डे संवसारीक करंड जिखपाचो यत्न करतलो. पाकिस्तान आनी भारत हाचे मदी द्विपक्षीय क्रिकेट माळ खेळनात, मात दोनूय पंगड आशिया करंच आनी आयसीसी सर्तींत एकमेकां आड खेळटात. पाकिस्तान तांची निमाणी भारत भोंवडी 2016 वर्सा केल्ली. आतां सात वर्सा उपरांत व्हो पंगड भारत भुयेंत आयला.
पाकिस्तानी पंगड सरळ हैदराबाद आयलो. भारतीय क्रिकेट मोगींनी तांका हुनहुनीत येवकार दिलो. कॅप्टन बाबर आझम आनी फास्ट बॉलर शाहीन आफ्रिदीन तांचे उपकार मानल्यात. हैदराबादच्या राजीव गांधी आंतरराष्ट्रीय स्टेडियमाचेर न्यूझिलंडा आड ते पयली सराव मॅच खेळटले. उपरांत 3 ऑक्टोबराक ऑस्ट्रेलिये आड तांची दुसरी सराव मॅच जातली.
2016 वर्सा पाकिस्तानी क्रिकेट पंगड टी-20 वर्ल्ड कप खेळपा खातीर आयिल्लो. ते चार मॅची खेळल्ले तातूंतल्या तीन मॅचींत तांका हार खावची पडिल्ली. हे सर्तींत तांका चवथी सुवात मेळल्ली. 2011 वर्सा पाकिस्तान पंगड वन-डे संवसारीर करंड सर्तींत वांटो घेवपा खातीर भारतांत आयिल्लो. ते उपांत्य फेरयेतं पावल्ले मोहालींत भारतान तांकां 29 धांवड्यांनी हारयल्लें. 1991 वर्सा ऑस्ट्रेलियेन इम्रान खानाच्या फुडारपणा खाला पाकिस्तानी पंगडा वन-डे संवसारीक करंड जिखल्लो. अंदूच्या वन-डे संवसारीक करंड सर्तींत 14 ऑक्टोबराक भारताची पयली मॅच भारता आड अहमदाबादच्या नरेंद्र मोदी स्टेडियमाचेर जातली.
पीसीबी अध्यक्षाची अरेरावी
पाकिस्तानी पंगडाक भारतांत जंगी येवकार दिलो. मात पाकिस्तानी क्रिकेट बोर्डाचो (पीसीबी) अध्यक्ष झका अश्रफ हाणे मात एका व्हिडिओत मत दुखोवपी वक्तव्य केले. अश्रफ पीसीबीचो अध्यक्ष जाल्या सावन भारता आड कितें ना कितें उलयत आसा. आशिया करंड 2023 चे हायब्रीड मॉडेला विशीं अश्रफ हाणें सामकी तिडक उक्तायल्ली. आतां तांचो एक व्हिडिओ सोशल मीडियाचेर व्हायरल जाता. तातूंत ताणे भारताक दुस्मान देश अशें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
