भांगरभूंय | प्रतिनिधी
चेन्नय, खबरां संस्था : केरळांतले 2018 तल्या हुंवाराचे परिस्थितीचेर आदारीत ‘2018 : एव्हरीवन इज अ हीरो’ ह्या सिनेमाक भारतान अधिकृतपणान ‘ऑस्कर अॅवॉर्ड्स- 2024’ खातीर वेंचून काडला. फिल्म फेडरेशनान आयज ही म्हायती दिली.
निवड समितीचे अध्यक्ष आनी निर्माते गिरीश कासरवल्ली हांणी पत्रकार परिशदेंत सांगलें, समितीच्या 16 वांगड्यांनी एकमतान हो मलयाळम चित्रपट देशाचें प्रतिनिधित्व करपा खातीर वेंचून काडलो.
आमी एका सप्तकांत 22 फिल्मां पळयलीं. मागीर ह्या सिनेमाची निवड जाली. ह्या 22 चित्रपटांतले जायते चित्रपट बऱ्या दर्जाचे आशिल्ले. देखून तो एक कठीण निर्णय आशिल्लो. दर एका सिनेमाचें विश्लेशण केल्या उपरांत आमी ‘2018: एव्हरीवन इज अ हिरो’ वेंचलो, अशें कासरवल्लीन सांगलें. ह्या 22 चित्रपटां मदीं ‘केरल स्टोरी’, ‘रॉकी और रानी की प्रेमकहानी’, ‘गदर- 2’ सारक्या हिंदी चित्रपटांचेर आनी ‘वाळवी’, ‘बाप-ल्योक’ सारकिल्ल्या मराठी चित्रपटांचेरूय चर्चा जाली.
‘2018 : एव्हरीवन इज अ हिरो’ सिनेमा विशीं
ज्यूड अँथनी जोसेफ हाणें दिग्दर्शीत केल्ल्या ह्या चित्रपटांतल्यान नागरिकांच्या भारतीय लोकाचार, परिस्थिती आनी मानसीकतेचेर उजवाड पडटा. ह्या सिनेमांत 2018 वर्सा केरळांत आयिल्ले आपत्ती विशीं उलयता. पूण तो फकत भारताच्याच न्हय तर संवसारभर घडपी आपत्तीचेंय प्रतिनिधित्व करता, अशी म्हायती गिरीश कासरवल्ली हांणी दिली. हवामान बदल आनी उदरगत हाचेरुय ह्या सिनेमांत टिप्पणी केल्या, अशें तांणी सांगलें. ह्या सिनेमांत अभिनेतो तोविनो थॉमस हांची मुखेल भुमिका आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
