भांगरभूंय | प्रतिनिधी
नवी दिल्ली, खबरां संस्था : कांय सरकारी अधिकारी मनाक येता तशें वागतात. कांय जाण मुळांत गिरेस्त आसतात, म्हयन्याक २ -३ लाख रुपया पगार, भत्ते, सुविधा मेळटात. म्हणटकच तांच्या वागपांत एक प्रकारचो झेत, नेट येता. ताचे त्रास सामान्य लोकांक सोंसचे पडटात.
दिल्लींत पोरूं एका आयएएस जोडप्यान आपल्या पाळीव सुण्याक मना प्रमाण धांवपाक, चलपाक मेळचें म्हूण पुराय स्टेडियम रितें केलें. देशभर ही गजाल तेन्ना गाजिल्ली. ह्या जोडप्याची दिल्ली भायर बदली करपाची तात्पुरती कारवाय केली. पूण आतां तातूंतले बायल आयएएस अधिकाऱ्याक निवृत्त जावचें पडलां.
नेमकें कितें जालें?
26 मे 2022 दिसा रिंकू डुग्गा आनी तिचो घोव संजीव खैरवार दिल्लीच्या त्यागराज स्टेडियमांत सांजवेळा भोंवडे खातीर आयिल्ले. थंय जायते खेळगडे सराव करताले तें तांणी पळयलें. कांय नवोदित खेळगडे आनी विद्यार्थ्यांचे पालकूय थंय हाजीर आशिल्ले. त्या आयएएस जोडप्या वांगडा तांचो पाळीव सुणोय आशिल्लो. खेळगडे आनी तांच्या आवय-बापायक आपल्या सुण्याक चलपाक त्रास जाता अशी कागाळ जोडप्यान केली.
सुण्याक मुक्तपणान भोंवपाक मेळचो म्हणून रिंकू आनी संजीव हांणी कर्मचाऱ्यांक पुराय स्टेडियम रितें करपाक लायलें. ‘सायबा’ कडल्यान आदेश आयिल्ल्यान कर्मचाऱ्यांनी बेगोबेग सगळ्या खेळगड्यांक आनी तांच्या आवय- बापायंक स्टेडियमांतल्यान भायर काडले. मागीर आयएएस जोडप्यान आपल्या पाळीव सुण्या वांगडा सुशेगाद भोंवपाक सुरवात केली. खेळगड्यांक तांची फेरी पुराय जातकच मैदानांत प्रवेश दिलो.
कसली कारवाय जाली?
प्रसार माध्यमांनी हो प्रस्न उखलून धरले उपरांत प्रशासन जागें जालें. ही गजाल केंद्र सरकारा कडेन गेले उपरांत गृहमंत्री अमित शाह हांणी संजीव आनी ताचे बायलेची दिल्ली भायर बदली केली. संजीव हांची लडाखांत जाल्यार रिंकू हांची थेट अरुणाचल प्रदेशांत. ह्या प्रकरणाची चवकशी पुराय जाल्या आनी आयएएस जोडप्यान आपल्या हक्कांचो गैरवापर केला, हें स्पश्ट जालां. देखून आतां रिंकू हांकां निवृत्त जावचें पडलां.
दिल्लींतल्या त्यागराज स्टेडियमाची देखरेख आनी वेवस्थापन दिल्ली सरकार करता. हें मैदान 2010 वर्साच्या राष्ट्रकुल खेळां खातीर बांदिल्लें. दिल्लीचे मुख्यमंत्री अरविंद केजरीवाल हांणी सांगिल्लें की, खेळगड्यांक सांजवेळा 7 उपरांत मैदानांत सराव करपाक मेळटा, पूण आतां खेळगड्यांक रातच्या 10 मेरेन सराव करपाक मेळटलें.
हें आयएएस जोडपें कोण?
54 वर्सां पिरायेची रिंकू ही 1994 वर्साचे बॅचीचे एजीएमयूटीचे कॅडर अधिकारी. ती दिल्लीच्या महसूल विभागांत काम करताली. उपरांत कारवाय म्हणून अरुणाचल प्रदेशाची मुखेल सचीव म्हणून बदली जाली. तिचो घोव संजीव खैरवार लेगीत 1994 बॅचाचो आयएएस अधिकारी. ताका ऍक्शन म्हणून लडाखांत धाडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
