भांगरभूंय | प्रतिनिधी
फांकिवंत वकील आनी जुवीज हांचीं पुस्तकां वाचचीं. तातूंत इंग्लीश भाशेचें सौंदर्य तांणी कशें केळयलां ताचो दिश्टावो जातलोच. वाचप्याच्या आंगांत विद्वत्तेच्या विचारांचो प्रवाह संचारीत जायत रावतलो. इंग्लीश हें संवसारीक साहित्य अणकारांतल्यान जाणून घेवपाचें एक जनेल.
सगल्या भाशांतलें साहित्य हे भाशेंत अणकारिल्लें आसा. वकील राम जेठमलानी हांचीं पुस्तकां हांवें खूब खेपे वाचलीं. Maverick Unchanged, Unrepentant हें अशेंच एक सुंदर पुस्तक. मुळांत हो वकील निर्भय. बेडर. कापाझदादीचो. देशांतली स्थिती, गुन्यांव, गुन्यांवगारी जग, फटवणूक, फटींगपणां, नागवणूक हाका लागून कशी जाल्या आनी तें दुश्टचक्र कशें इबाडत चल्लां ते विटणुकेचेर तांणी ह्या पुस्तकांत बडयो मारल्यात. एक पुस्तक वाचतकच शंबर पुस्तकां वाचिल्ल्याचो अणभव येवचो अशे हे ग्रंथ. कारण हजारांनी पुस्तकां वाचून करमेल्ले चिंतनशील लेखक हे.
Big egos, small men हें तांचें अशेंच एक सुंदर पुस्तक. जाका भाशांचेर काळजांतल्यान प्रेम आसा तो वाचक हें पुस्तक वाचून सुखावतलो. कारण तातूंतली इंग्लीश भाशा. सणसणीत. तिकतिकपी. तेजान चकचकपी. Obsequious and servile attitude ही उतरांची एक देख दितां. असलीं पुस्तकां वाचतना मेजार ऑक्सफर्ड वा मेरियम वेबस्टर कोश घेवन बसचें पडटलें हें नक्की. नाजाल्यार 60 टक्के पुस्तक तकलेच्या आयदनांत देंवचें ना. इंग्लीश वाचनाक आनीक दुसरें वखद ना. तें नासतकच लेखक बाविल्लेवरी जाता. हेर चारचौगांच्या लेखकांच्या जमावांत ताका एक न्यूनगंड जाता.
गंवांचे पीठ जितलें बरें कालयतात आनी मस्तितात तितल्यो चपात्यो, रोटयो, फुलके बरे जातात. पापडांची पिठीय तशीच. जितली बडयतात, मस्तितात तितले पापड विरविरीत जातात. वाचनाचें पीठ जितलें खोल खोल नेटान साबार वर्सां मस्तितात तितलें तो लेखक उतरां बरे तरेन उक्तावंक शकता. चार वाक्यांनी लेखकाची वाचनसमृध्दी आनी ताकद कळटा.
जिमांत वचून जो व्यायाम करता ताचीं मनगटां पळेतनाच कळटा. स्नायूंचे पीळ दिसनाफुडें कळटा की हो दीसपट्टो व्यायाम करता. जो वाचनांत करमेला, त्या लेखकान बरयिल्ल्या लोणच्याची रूच एका मिणटान कळटा. तो पुस्तकांच्या जिमांत गेल्ल्यान उतरांक, वाक्यरचनेक, शैलीक, मांडावळीक पीळ दिश्टी पडटात. पोकी सूज न्हय ती.
प्रेम रावत हांचें एक पुस्तक हालींच वाचलें. इंग्लीश. Hear Yourself. शांतीचो संदेश घेवन प्रेम रावत जगांतल्या सगल्या देशांनी वतात. तांची भाशा सुंदर, गोड. वाक्यां ल्हान. हें पुस्तक न्यू यॉर्क टायम्सान बेस्टसेलर वळेरेंत घाला हाचे वयल्यान पुस्तकाची ताकद कळटा. तातूंत राल्फ वाल्डो एमरसन, रुमी, कबीर, मीरा आनी हेरांच्यो कांय वळी संदर्भा प्रमाण जाय थंय दिल्यात. हें पुस्तक विक्रमी पांवड्यार सद्या खपता. प्रेम रावत लेखक हो भितरले चेतनेचो आयन्स्टायन कसो अशें एका लेखकान म्हणलें. अमेरिकेची कवयित्री जुआं हेरेरा हिणें ह्या पुस्तकांतलीं उतरां म्हणल्यार आनंदाचे स्वर अशें म्हणलां. असलीं इंग्लीश पुस्तकां वाचिनात ते खऱ्या अर्थान वैचारीक पांवड्यार सामके गरीब आनी खांकनवाळ.
कश्मीरी लेखक हाजिनी कांय तेपा आदीं संवसाराक अंतरले. तांचे कडेन वार्तालाप करपाची संद म्हाका कांय खेपे मेळिल्ली. कश्मीरी कोंकणी कथांच्या अणकारा वेळार. पयलें तांचें मंडळ पणजे आयिल्लें तेन्ना आनी उपरांत आमचें मंडळ श्रीनगरांत गेलें तेन्ना. हो लेखक बरोच व्यासंगी हें ताच्या उलोवण्यांतल्यान, हावभावांतल्यान आनी आत्मविश्वासा वेल्यान कळटालें. खूब विशयांचेर हांव तांचे कडेन उलयलां. कविता, उर्दू शेर आनी वाचनाचें म्हत्व अशे विशय. कवितेंत उत्स्फूर्तता जाय आनी तितलोच समतोल राखून उपरांत कारागिरी जाय अशेंय ताणी सांगलें. घोगो आयलो तसो गायलो, बरें आसा. पूण उपरांत कारागिरी करूंक जाय. Finesse दिवंक जाय अशें तांचें म्हणणें. आनी घोगो येवपाक आनी कारागिरी करपाक आयसपयस व्यासंग जाय अशें हाजिनी हांणी सांगलें. तांणी म्हाका The ultimate joy of ultimate reading हें पुस्तक कश्मीराक आसतना वाचपाक दिलें आनी याद्दीन तें आठ दिसांनी विमानतळार पावोवंक भायर सरतना परत घेतलें. मोन्याक सपन पडटकूच तो सांगतलो कसो? बरीं पुस्तकां वाचपी वाचकाची गत अशीच जाता.
गरयतल्याक केन्ना कितें सांपडत आनी गरयेक लागत हाचो नेम नासता. तशेंच अधाश्या सारक्या वाचकाक, केन्ना कितें मेळत सांगू नजो. हालींच के वि बेलसरे हांच्या एका पुस्तकांत एक श्लोक मेळ्ळो शंकराचार्यांचो. तो दिवचे पयलीं लेखकान असले धाकुटले कवितेक कारिका अशें म्हणटात हें स्पश्ट केलां. कारिका हें संस्कृत उतर. कारिका म्हळ्यार शाणेपणान, विचारान भरिल्लें धाकटुलें अल्पाक्षरी काव्य. कारिका रचपाक उणीच पिराय पन्नास तरी जाय.
वाचनसमृध्द लेखक बरयता वा उलयता तें क्लासिकल म्हणल्यार अभिजात पांवड्याचें आसता. नाजाल्यार थंयचे थंयच मुद्दे घोळोवप, खिरोवप आनी गायक आवर्तनां परत परत मारता तशें डायल्यूशन करप हाका अर्थ ना.
रमेश वेळुस्कार उत्तर प्रदेशांत वतालो तेन्ना ताका हांव उदय प्रकाशाचीं आनी हेर हिंदी लेखकांचीं पुस्तकां हाडूंक सांगतालो. तो मुजरत तीं घेवन आकाशवाणीचेर येतालो. पुस्तकांचेर, हिंदी लेखकांचेर उलयतालो. हिंदी विश्व खूब व्हडलें आसा. अंतरीक्ष कशें. तातूंत खेळपाक वचप म्हळ्यार रेंवेच्या कणान दर्यांत खेळटना सागरांत विरगळून नाच्च जावप. रमेशबाबाचें हिंदी वाचन आकांताचें आशिल्लें.
Intangible realm म्हळ्यार अस्पर्श अशे कांय प्रांत आसतात जे वाचनानूच अणभवूं येतात. तो अणभव जितलो दाट घट, चड, जड तितलें लेखकाचे लिखणेचें पातें धारदार तरसादी परसूय च-क-च-क चकचकत रावता. वाचकाचे दोळे ते प्रखर दीप्तीन दिपकावतात, कारण त्या उतरांनी काळखांतल्यान उजवाडा कडेन व्हरपाची उर्जा आसता!
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
