भारताचो सिंगापूराचेर गोलांचो शिंवर

भांगरभूंय | प्रतिनिधी

भारताच्या बायलांच्या हॉकी पंगडान 19वे आशियायी खेळां सर्तींतले आपले अ गटांतले पयले मॅचींत सिंगापूर पंगडाक 13-0 अशा गोल फरकांनी हारयलो. भारतान मॅचीचेर पुराय शेक दवरलो, तशेंच प्रतिस्पर्धी पंगडाक एक गोल लेगीत करपाक दिलो ना. भारताची युवा स्ट्रायकर संगीता कुमारी हिणें हॅट्रीक केली.

भारतान पयल्या दोन क्वॉर्टरांत आठ आनी निमाण्या दोन क्वॉर्टरांत पांच गोल केले. उदितान (6वें मिनट), सुशीला चानू पुखरामबम (8वें मिनट), दिपिका (11वें मिनट), नवनीत कौर (14व्या मिनटाक दोन), दीप ग्रेस एक्का (17वें मिनट), संगीत कुमारी (23वें, 47वें, 53वें मिनट), सलीमा टेटे (35वें मिनट), मोनिका (52वें मिनट) आनी वंदना कटारिया (56वें मिनट) हाणें गोल केले.

भारतान सुरवाती सावन आपलो शेक दवरीत प्रतिस्पर्धी पंगडाच्या गोलपोस्टाचेर सेगीत हल्ले केले. ताका लागून भारताक सुरवातीकूच दोन पॅनल्टी कॉर्नर लेगीत मेळ्ळे. उदितान मॅचीच्या सव्या मिनटाक गोल करून भारताचें खातें उगडलें.

पयलो गोल केल्या उपरांत कांय मिनटांनी पॅनल्टी स्ट्रोक मेळ्ळो. सुशीला चानून गोल करून स्कोर 2-0 केलो. ते उपरांत भारतान थारावीक अंतरान गोल करीत गेलो. दुसऱ्या अर्दांत लेगीत भारतान आपलो शेक कायम राखलो आनी अखेरेक एक सोंपें जैत जोडलें.