भांगरभूंय | प्रतिनिधी
नवी दिल्ली, खबरां संस्था ः जीएसटी गुप्तचर खात्यान 12 कॅसिनो आनी 12 ऑनलायन रियल- मनी गेमिंग कंपनींक 55 हजार कोटी रुपया कर थकबाकी विशीं नोटीस धाडल्या. ह्या कंपनींनी ड्रीम इलेव्हन, गेम्स प्ले, ट्वेंटी फोर सेवन, हेड डिजिटल वर्क्स हांचो आस्पाव आसा.
गेमिंगांतल्यान मेळपी एकूण येणावळीचेर जीएसटी फारीक करूंक नाशिल्ल्याचो आरोप ह्या कंपनींचेर आसा. गेमींग युनिकॉर्न कंपनी ड्रीम इलेव्हन कंपनीन 25 हजार कोटी रुपयांची जीएसटी चुकयिल्ल्यान नोटीस जारी केल्या. अप्रत्यक्ष कर भरपाक कळाव जाल्ल्यान जारी केल्ली देशांतली ही सगळ्यांत व्हडली कर नोटीस. ह्या उद्देगां कडेन संबंदीत अधिकाऱ्यांच्या म्हणण्या प्रमाण, फुडल्या काळांत गेमींग कंपनींक एक लाख कोटी रुपयांची नोटीस जारी जावंक शकता.
ड्रीम इलेव्हन उच्च न्यायालयांत
ही नोटीस मेळ्ळे उपरांत ड्रीम इलेव्हन कंपनी मुंबय उच्च न्यायालयांत गेली. हाचे आदीं डिसेंबर 2022 वर्सा बेंगळुरूंतल्या ऑनलायन गेमींग कंपनी गेम्स क्राफ्ट टेक्नॉलॉजीक 21 हजार कोटी रुपयांची कर नोटीस जारी केल्ली.अप्रत्यक्ष कर प्रकरणाच्या इतिहासांत इतले व्हड प्रमाणांत कर नोटीस धाडपाची ही पयलीच खेप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
