भांगरभूंय | प्रतिनिधी
नवी दिल्ली, खबरां संस्था ः शारांत झोपडपट्टी आनी भाड्यान रावपी लोकांक योग्य घरां दिवपाचें सपन साकार करपा खातीर केंद्र सरकार बेगीनूच 60 हजार कोटी रुपयांची अनुदान येवजण सुरु करतलें. विधानसभा आनी लोकसभा वेंचणूक मतींत घेवन कांय म्हयन्यांनी ही येवजण सुरू करूं येता. ताचे खाला वर्साक 3 ते 6.5 टक्के व्याजदर अनुदानाचेर 9 लाख रुपया मेरेनचें रीण मेळटलें. 20 वर्सां खातीर 50 लाखां मेरेन रीण घेवपी हे येवजणे खातीर पात्र थारतले. ही येवजण सद्याचे प्रधानमंत्री आवास येवजणे परस वेगळी आसतली.
नव्या येवजणेचो फायदो शारांतल्या सुमार 2.5 लाख लोकांक जातलो. हे संबंदी बँकांची सरकारी अधिकाऱ्यां कडेन बसका जातली. बँकांनी बसके आदीं लावार्थी वळख प्रक्रिया सुरू केल्या. हालींच केंद्रीय गृह आनी नगर उदरगत मंत्री हरदीपसिंह पुरी हांणी सांगलें, शारांनी घर घेवपाक सोदपी लोकां खातीर गृह रीण अनुदान येवजण सप्टेंबरांत निमाणी जातली.
घर खरेदी, रियल इस्टेट क्षेत्राक जातलो फायदो
नवे येवजणेक लागून जायते प्रकल्प पुराय करपाक मजत जातली. हाका लागून जायत्या क्षेत्रांनी रोजगार मेळटलो अशें अर्थीक तज्ञांक दिसता. घर खरेदी करपी आनी रियल इस्टेट क्षेत्राक चालना मेळटली तशेंच अर्थवेवस्थेक गती मेळटली. हालींच रीण म्हारग जाला. फाटल्या वर्सा मे म्हयन्यांत आरबीआयन रेपो दर 2.5 टक्क्यांनी वाडयल्लो.
शारांतल्या नागरिकांचें सपन पुराय करतलें
शारांनी भाड्यान रावपी, झोपडपट्टी, चाळ, अनौपचारीक वसणुकांनी रावपी कुटुंबांनी स्वताचें घर घेवपाचें सपन पळोवपाक सुरवात केल्या. तांकां आपलें स्वताचे घर घेवपाचें आसा. तांकां बँकां कडल्यान रीण मेळटलें. लाखांनी रुपयांच्या व्याजाचेर सुटका दिवन तांका मजत करपाचो निर्णय घेतला अशें पुरी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
