भांगरभूंय | प्रतिनिधी
नवी दिल्ली, खबरां संस्था ः 2000 रुपयांची नोट परत करपाक फकत 5 दीस उरल्यात. पूण आतां मेरेन 25 हजार कोटी रुपयाच्यो नोटी बँकांनी परतून आयल्ल्यो नात. आरबीआयन अंदूं 19 मे दिसा परिपत्रक जारी करून 30 सप्टेंबर मेरेन ह्यो नोटी बँकांनी जमा करपाचो वा अदलाबदल करपाचो आदेश दिल्लो. हाचे उपरांत 3056 अब्ज रुपया बँकांनी परत आयले. पूण लोकां कडेन अजूनय 7 टक्के नोटी आसात.
आरबीआयन बँकांक 30 सप्टेंबर मेरेन 2 हजार रुपयांची नोटी बदलपाक वा खात्यांत जमा करपाक सांगलां, पूण ते उपरांत लेगीत ती कायदेशीर उरतली अशेंय सांगलां. फकत लोकांक ह्यो नोटी बँकांक परत करपाक प्रोत्साहन दिवपा खातीर अशें केलां.
नोटी बदलपाक कसलेच कागदपत्रांची गरज ना
सरकारान जारी केल्ल्या मार्गदर्शक तत्वां प्रमाण बँकेंत नोटी बदलपा खातीर कसलेच कागदपत्र सादर करपाची गरज ना. एका वेळार 20,000 रुपयाच्या मर्यादे मेरेन 2000 रुपया नोटींची अदलाबदल करूं येता म्हळ्यार हेर नोटांनी अदलाबदल करूं येता. तुमचे कडेन खातें आसल्यार 2000 रुपयाच्यो कितल्योय नोटी जमा करूं येतात.
30 सप्टेंबर मेरेन नोटी जमा करूंक ना जाल्यार?
तुमी वेव्हारा खातीर 2000 रपयाच्यो नोटी वापरुं शकता आनी पेमेंट म्हणूनय मेळूं येतात. पूण 30 सप्टेंबर 2023 दिसा वा ताचे आदीं ह्यो नोटी जमा करपाचो वा अदलाबदल करपाचो सल्लो आरबीआयन दिला.
2000 रुपयाची नोट 2016 वर्सा सुरू जाल्ली
2000 रुपयांची नोट नोव्हेंबर 2016 वर्सा सुरू जाली. ते उपरांत प्रधानमंत्री नरेंद्र मोदी हांणी रातची आठ वरांचेर घोशणा करून 500 आनी 1000 रुपयांच्या नोटींचेर बंदी घाल्ली. ताचे सुवातेर नव्या डिजायनाची 500 आनी 2000 रुपयांची नोट आयिल्ली. आरबीआयन 2018-19 वर्सा सावन 2000 रुपयांची नोट छापप बंद केलां. देखून 2021-22 वर्सा 38 कोटी 2000 रुपयाच्यो नोटी नश्ट जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
