भांगरभूंय | प्रतिनिधी
खलिस्तानी आतंकवाद्यांच्या प्रस्ना वयल्यान भारत सरकारान फाटल्या कांय दिसांनी आपले मुत्सद्देगिरीच्या मार्गान कॅनडाचेर जें किदें आंतरराष्ट्रीय चेपण हाडलां ताचे परिणाम ल्हवू ल्हवू कांय जायना पूण दिसूंक लागल्यात, आनी ताचे पसून खूब थाकाय मेळ्ळ्या. कॅनडाक त्रासांत उडोवपाची एकूय संद केंद्रांतल्या मोदी सरकारान सोडली ना. ताका लागून भारताचें मुत्सद्देगिरीचेंच हें जैत मानतात. पूण हें चक्र आतां हांगाच थांबचें ना हाची दक्षताय भारताक घेवची पडटली. खलिस्तानी आतंकवाद पुराय नानपयत करुनूच भारताक ही लडाय सासणाची सोंपोवची पडटली आनी कॅनडान तीच संद भारता खातीर मेळोवन दिल्या अशेंय म्हणपाक जाता. खलिस्तानी समर्थकांचें पुरायपणान भकीक पडिल्ल्या कॅनडाच्या जस्टीन ट्रुडो हांच्या सरकाराचे दोळे भारतांत तांचेर हाडिल्ल्या आंतरराष्ट्रीय चेपणाक लागून बरेच उक्ते जाल्ल्याचें दिसूंक लागल्यात, आनी भारताक आतां खलिस्तानी चळवळीचो बंदोबस्त करपाची आयतीच संद मेळ्ळ्या.
केंद्र सरकारान ह्या प्रकरणांत सध्या जीं पावलां घाल्यांत तीं पळयल्यार खलिस्तानी आतंकवादाचो प्रश्न सोमतोच निकालांत काडपाचो भारताचो यत्न दिसता, आनी तशें जाल्यार ताका येवकार दिवपाक जाय. कॅनडांत फाटल्या दोन तीन दिसांत थंयच्या सरकारान म्हणात वा प्रधानमंत्री जस्टीन ट्रुडो हांणी पयलींच्या आपल्या ताठर धोरणाचेर जी मवाळ भुमिका घेतिल्ली दिसता ताचें फाटलें कारण म्हणल्यार भारतान कॅनडाक मुठीक मूठ ह्या न्यायान कसलीच भीडमुर्वत बाळगिनासतना जी मूठ मारून आनी वेळ व्हगडायनासतना कारवाय करपाक फाटीं फुडें पळयलें ना अशें म्हणपाक जाता.
कॅनाडांतल्या वादान परिशिमेर पाविल्ले कडेन आसतना भारतान विदेशांतल्या खलिस्तानी समर्थकांक एका फाटल्यान एक अशे जे धपके दिल्यात, तातूंतल्यान खलिस्तानी आतंकवादीच न्हय जाल्यार तांच्या रेवाड्यांत सांपडिल्ले प्रधानमंत्री जस्टीन ट्रुडो बरेच भानार आयल्यात. कॅनडियन नागरिकांक भारतांत प्रवेश करपाक घाल्ली बंदी हो भारताचो पयलो मास्टर स्ट्रोक आशिल्लो. ते उपरांत शीख फॉर जस्टिसाचो मुखेली आशिल्ल्या गुरुपतवंत सिंग पन्नू हाचे चंदिगडांतले मालमत्तेर राष्ट्रीय तपास यंत्रणेन (एनआयए) जप्ती हाडून खलिस्तानी आतंकवादा आड भारतान झूज सुरू केल्ल्याचें संकेत दिल्यात. पन्नूक तीन वर्सां पयलींच फरार घोशीत केल्लो आनी सभावीक ताणें विदेशांत आलाशिरो घेवन आपल्यो कारवायो चालूच दवरिल्ल्यो.
भारत आनी कॅनडा हांचे मदल्या तणावाचें कारण थारिल्ल्या हरदीपसिंग निज्जर हाचे हत्येन आतां वेगळेंच मोडण घेतलां. ताचीय पंजाबांतली मालमत्ता जप्त करपाचे निर्देश दिल्यात. निज्जर हाचे हत्येंत आपलो हात ना हें भारतान स्पश्ट केले उपरांत कॅनडा सरकारान खलिस्तानीवाद्यांच्या चेपणा सामकार नतमस्तक जावन जी कारवाय भारता आड केली तातूंतल्यान फुडलें रामायण घडलें आनी आतां हे लडायेंत भारतान बरीच झेप घेतिल्ल्याचें चित्र दिसता. खलिस्तानी आतंकवाद पुराय सोंपोवन भारताक आतां ही लडाय सोंपोवपाचीच आसा आनी तशें घडून आयल्यार प्रधानमंत्री जस्टीन ट्रुडो हांचे आमीच न्हय जाल्यार जगान उपकार मानपाक जाय. कारण खलिस्तानवादी कॅनडांतूच न्हय जाल्यार ब्रिटना सयत हेर कांय देशांनी लेगीत बरोच जम बसयला. जो फुडारांत त्या देशांकूय मारक थारूंक शकता.
कॅनडाच न्हय जाल्यार हेर कांय देशांनी वचून स्थिरस्थावर जाल्ल्या खलिस्तानी समर्थकां आड केंद्र सरकारान व्हडलें पावल घातलां आनी ताचें ओसीआय म्हणल्यार ओव्हरसीज सिटिझनशीप ऑफ इंडिया कार्ड रद्द करपाचोय निर्णय घेतला. ताका लागून तांच्या भारत विरोधी कारवायांक आळो बसपाक शकता. राष्ट्रीय तपसा यंत्रणेन जाल्यार अशा 19 खलिस्तानी आतंकवाद्यांची वळेरीच जाहीर केल्या. एनआयएन केल्ले हे कारवायेक लागून खलिस्तानी आतंकवाद्याचो कणोच मोडला. ओसीआय रद्द जाल्ल्यान हे खलिस्तानीवादी भारतांत तर येवपाक शकचे नात आनी तांची भारतांतली मालमत्ताय जप्त करपाचो मार्ग सरकाराक सोंपो जाला.
भारतान सामको विचार करून घेतिल्ल्या ह्या निर्णयाक लागून आनी जो फायदो जातलो तो म्हणल्यार खलिस्तानी निर्मणे खातीरचे चळवळीक ह्या समर्थकां कडल्यान जावपी अर्थीक रसद बंद जावपाक मजत जातली. ब्रिटन, ऑस्ट्रेलिया, अमेरिका आनी कॅनडांत तळ ठोकून आशिल्ल्या खलिस्तानी आतंकवाद्यांचो आनी तांच्या समर्थकां खातीर हो निर्णय म्हणल्यार व्हडलो धपको अशें मानतात. कॅनडा सयत ह्या चार-पांच देशांनी चड करून खलिस्तानी समर्थक आपली तकली वयर काडटना दिसतात, आनी भारतानूय तांकां तशें परतून परतून सांगलां. ब्रिटनाचे प्रधानमंत्री ऋषी सुनक आसूं वा ऑस्ट्रेलियेचे प्रधानमंत्री, हांचे कडेन जी-20 देशांचे वैश्वीक संमेलना मजगतीं प्रधानमंत्री नरेंद्र मोदी हांणी हो प्रस्न उपस्थीत करून खलिस्तान समर्थकांचे चळवळीक सारें घालूं नाकात अशी मागणी केल्ली.
भारतान जायत्या माध्यमांतल्यान केल्ले मागणे उपरांतूय ह्या देशांतली खलिस्तानी चळवळ थंड पडपाची चिन्नां दिसनाशिल्ली. पूण कॅनडाचे प्रधानमंत्री जस्टीन ट्रुडो हांणी आतां हें काम बरेंच सोंपें केलां. पुराय संवसाराकूय हो प्रस्न आतां समजला आनी ताचे वयल्यान भारताक खूबशा देशांचो तेंकोय मेळटा. कॅनडा, ब्रिटन हांकांय ताची दखल घेवची पडटली. कॅनडाक आतां मोवपणाची भुमिका घेवची पडटा अशें थंयच्या सद्याच्या घडणुकां वयल्यान स्पश्ट जावपाक लागलां. कॅनडांत खलिस्तानी समर्थकांची चळवळ नेट धरपाक लागल्या हें थंय सगलेच कडेन दिसपी पोस्टर्सां वयल्यान दिसून येता, पूण आतां कॅनडा सरकारान हे पोस्टर भारता आड आशिल्ल्याचे संकेत दिवन बेगोबेग ते काडून उडोवपाचो आदेश दिला. कॅनडांतल्या एका गुरुद्वारांत भारतीय राजनैतीक अधिकाऱ्याची हत्या करपाचें आवाहन करपी पोस्टर्स लायिल्ले. ते आतां थळाव्या यंत्रणेच्या अधिकाऱ्यांनी हस्तक्षेप करून काडून उडयल्यात. ह्यो घडणुको ल्हान आसल्यो तरी भारतान कॅनडाक जशाक तशें न्हय जाल्यार ताचे परस व्हडली मूठ मारिल्ल्यान आनी तें घडून आयिल्ल्यान भारताच्या नव्या ताकदीचो संदेश तातूंतल्यान मेळ्ळा.
युनो आमसभेच्या निमतान न्यू यॉर्कांतल्या क्वाड विदेश मंत्र्यांचे बसकेंत लेगीत खलिस्तानी आतंकवादी निज्जर हाचे हत्येचो मुद्दो उपस्थीत करपाचो यत्न जालो, पूण जपानान ताका सहमती दिवंक नाशिल्ल्यान कॅनडा खातीर तो आनीक एक व्हडलो धपको थारलो. खलिस्तानी प्रस्नाचेर भारतान जस्टीन ट्रुडो हांचें नाक दामलें हें बरें जालें आनी ताका लागून सगल्यांचीच तोंडां उगडपाचो मार्ग आतां मेकळो जाला. खलिस्तानी आतंकवाद अशाच धाडसी निर्णयांक लागून सोंपोवपाची उमेद नव्या शक्तीमान भारता कडल्यान बाळगूंक जाता…
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
