भांगरभूंय | प्रतिनिधी
दुबय, हाँगकाँग आनी काठमांडूंतल्यान भांगराची तस्करी भारतांत
काठमांडू, खबरां संस्था ः भारतांत भांगराच्या तस्करीचो नवो त्रिकोण तयार जावपाक लागला. दुबय, हाँगकाँग आनी काठमांडूंतल्यान भांगराची तस्करी भारतांत सुरू आसा. हातूंत चीनी तस्कर चड सक्रीय आसात. हुस्क्याची गजाल म्हणल्यार नेपाळांतल्यान भारतांत 61 किलो भांगर व्हरतना धरिल्ल्या स चीनी नागरिकां कडेन भारतीय आधार कार्ड सांपडलां. हे तस्कर भारतांत भांगर पावयताले ते खातीर ते नेपाळी आसात हें दाखोवपा खातीर हांगा नागरिकत्वाचे कागदपत्रूय तयार केल्ले.
काठमांडूचे आदले डीआयजी हेमंत मल्ल हांणी सांगलें, नेपाळ हो प्रत्यक्षांत भारतांत भांगराची तस्करी करपाचो ट्रान्झिट मार्ग. ते तीन तरांनी चलता. पयलीं दुबय आनी हाँगकाँग हांगांच्यान मोटारसायकलाच्या भागांत लिपयिल्लें भांगर हवाई मार्गान नेपाळाक पावता. दुसरें म्हणल्यार कलेक्टर नांवाच्या चीनी तस्करांक नेपाळांत मेळटात. तिसरे शिमे वयल्यान भांगर व्हरून भारतांत वचपी हस्तक. फकत चीनी हस्तक तस्करींत सक्रीय आसात. शिमेचेर खंयचीय तपासणी जाली जाल्यार ते केन्ना नेपाळी आनी केन्ना भारतीय अशें म्हणून आधार कार्ड दाखोवन पळून वतात. एकाच वेळार 88 किलो भांगर जप्त करपाक अधिकाऱ्यांक येस आयलां. एका अर्थीक वर्सात दोन क्विंटल भांगर जप्त जाता.
हाचे वयल्यान दर वर्सा हजारांनी किलो भांगर तस्करी वरवीं नेपाळांत हाडटात. दुबय आनी हाँगकाँगतल्यान येवपी भांगराक नेपाळाच्या बाजारांत प्रवेश मेळना, देखून हांगाच्या चलनाचें मोल वाडलां. दर 100 भारतीय रुपयाक नेपाळी रुपयाचो थारावीक विनिमय दर 160 आसा. भारतांत भांगराची चड मागणी आशिल्ल्यान 100 नेपाळी रुपयांची किंमत 155 भारतीय रुपया मेरेन वता. शिमे वयल्या वेपाऱ्यांक लेगीत विनिमय दरांत असो फरक दिसपाची ही पयलीच खेपे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
