भांगरभूंय | प्रतिनिधी
नवी दिल्ली: सद्याच्या धांवपळीचे जिणेक लागून मनशाचें आयुश्य उणें जाल्ल्याचें खूबशे जाण म्हणटात. पूण एकल्यान म्हणलां की मनीस आतां 150 वर्सां मेरेन जगूंक शकता. हाचेर कोणाचोच विस्वास बसचो ना. पूण संशोधकांनी हो दावो केला.
1900 च्या दसकाचे सुरवाते सावन विज्ञानांतल्या व्हड येसा सयत मनशाच्या आयुश्यांत सुमारा भायर वाड जाल्या. वासिनांचो विकास आनी योग्य उपचार सुविधांक लागून मनीस जातीक कांय दसकां पयलीं घातक समजुपी खूबशा दुयेंसाचेर मात करपाक मजत जाल्या.
न्यूयॉर्क पोस्टांतल्या एका अहवाला प्रमाण डॉ. अन्सर्ट वॉन श्वार्झ हांचो विस्वास आसा की स्टेम सेल संशोधनाक लागून मनीस ह्या शेंकड्याच्या अखेरेक 150 वर्सां मेरेन जगतलो.
डॉ. अर्न्स्ट हे ट्रिपल बोर्ड-प्रमाणीत इंटर्निस्ट आसात. सीडर्स सिनाय मॅडिकल सेंटराचे कार्डिओलॉजिस्ट, यूसीएलए हांगाचे डेव्हीड गेफेन स्कूल ऑफ मेडिसीन आनी हार्ट इन्स्टिट्यूट ऑफ द हॉस्पिटल ऑफ सदर्न कॅलिफोर्नियाचे आसात. तांणी सिक्रेट्स ऑफ इमॉटलिटी आनी द सिक्रेट वर्ल्ड ऑफ स्टेम सेल थेरपी सारकीं पुस्तकां बरयल्यांत. ते म्हणटात की म्हजो विस्वास आसा की मनीस आपलें आयुश्य वाडोवंक शकता. घडये कांय वर्सांनी लोक 120, 150 वर्सा जगूंक शकतले.
न्यूयॉर्क पोस्टा कडेन उलयतना तांणी म्हणलें हाचो अर्थ असो न्हय की आमी हातरुणार मरणाची वाट पळयतले. तांच्या म्हणण्या प्रमाण फुडल्या कांय काळांत दरेक दुयेंस नानपयत जातलें आनी पिरायेचो शेंकडो हुपून लेगीत मनीस वेवस्थीत जीण जगूंक शकतलो.
पूण पुश्टीक अन्न खाले बगर आनी नेमान व्यायाम केले बगर हें शक्य ना हाचेर डॉ. अर्न्स्ट भर दितात. तांणी ठळकपणान सांगलें की 30 वर्साची पिराय ही अशी वेळ आसा जेन्ना एखाद्याक दीर्घ आयुश्या खातीर जिणेशैलींत बदल गरजेचे आसतात.
डॉ. अर्न्स्ट हांणी म्हणलें की कुडींत स्टेम सेल विकसीत करून मनीस दिर्घायुश्य सहज जगूंक शकता. आमी दुयेंस बरे करपा खातीर वखदांचो वापर करूंक शकता. तशेंच आतां आमी मुखेलपणान स्टेम सेल थेरपी वापरून स्वताक तंदुरुस्त करूंक शकतात.
स्टेम सेल म्हणल्यार कितें?
डॉ. अर्न्स्ट हांणी म्हणलें की स्टेम पेशी हो फुडार आसा. जरी स्टेम पेशी एफडीए प्रमाणीत नासल्यो तरी लेगीत ह्या वखदांचो फुडार आसा. जंय आमी दुयेंस बरे करूंक शकता आनी आयुश्य वाडोवंक शकता वा जाण्टेपणाच्यो कांय प्रक्रिया उण्यो करूंक शकता.
अधिकृती नोंदी प्रमाण मनीस जातीच्या इतिहासांत फक्त एक व्यक्ती 120 वर्सा मेरेन जगल्या. ताचें नांव आसा जीन कॅलमेंट. तो फ्रान्सालो रहिवाशी आशिल्लो आनी 1997 वर्सा पिरायेचीं 122 वर्सा आनी 164 दीस तो जगलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
